السلام عليكم ورحمة اللّــه تعالى وبركاته
بأنامل الشـاعر : ناصر الفراعنه
قصيدة وصف الذلول في قصيدة اللغز المشهورة
بسم الإله الذي لا يحمد على مكروه سواه
هذه قصيدة لي قام بطرحها احد الاخوان
جزاه الله خيرا في احد المنتديات ..وهي تطلب
مني كثيرا الا اني لا احفظها .. ولكن بفضل من الله ثم
بفضل هذا الاخ الذي طرحها كاملة وجدتها
وها انا اطرحها لكم ..ومع قصتها وسالفتها
قام الشاعر المعروف (نجد العتيبي) بوضع قصيدة لغز مشهورة في ما يقارب
سبعين بيت جميعها تتكلم عن هذا اللغز ..ثم عرض قصيدته على الشعراء ..
فطلب الشاعر نجد مني
ان اشارك في حل اللغز ..فما كان مني الا ان لبيت
نداء الشاعر العتيبي ووضع قصيدة من اكثر من سبعين بيت وحليت
اللغز فيها وكان حل اللغز هو (اللسان) .
.المهم اني رديت على العتيبي على نفس منواله المروبع الا اني
جددت من ناحية طريقة النظم
فهي مروبع مروبع وايضا مروبع ...اكيد راح تقولون كيف .. بأقولكم اني
جعلت القافية على حرف في كل مروبعة ثم على نفس المروبعة ونفس القاف
اسبقه بأحد حروف المد الثلاثة في كل مروبعة اربع مرات
اي تكون القافية على النظام هذا
المروبعة الاولى:ث , ث, ث,
المروبعة الثانية:ايث,ايث,ايث
المروبعة الثالثة :اوث, اوث,اوث
المروبعة الرابعة:آث ,آث, آث
وهذا ما قاله
الشاعر ناصر الفراعنة
راكب اللي ما غذيناها عبث"="بنت هرش ملحته خمسٍ ورث
كنّها تنتل من الرقّة جثث"="لا عطت مع صيهدٍ عقب الرغاب
صيعرية كن مرافضها دماث"="كن حدر خفافها مثل الحثاث
دقّها الميسم ثلاثٍ مع ثلاث"="جوس ترعى في الدِّيَر نوع اغتصاب
سمحةٍ لمصارع الفرجة لهوث"="لو تبي سبتك قبل يوم الثلوث
جابته ما عن هوى الطرقي نكوث"="لو يريد من اشهب الضيحة سحاب
صيعرية لا رثيث ولا غثيث"="من على عاشر بطن مابه خبيث
حثّة الرجلين والممشى حثيث"="كنّها الجاوي على سلك الرباب
لا مشت شفت ادهم الرقّه شلَح"="والحصا صفقه مثل صفق المَلَح
خطْر ينبت في قرى الجرة بلح"="تظهر الما اللي ثمان سنين غاب
كنها من تحت تنهش بالرماح"="سابق تسبق هماريق السحاح
هقوتي لو هي عطاها الله جناح"="ان تسابق للفضا جن التراب
كم وكم روحٍ بغت منها تروح"="يوم طقّت خدها مثل الطموح
او كما طير خفق من راس صوح"="من وحم ظلّه على الكدري عذاب
كن ردن اوبارها خْزام وشيح"="وكن حدر عرقوبها قرم يصيح
موخرٍ مملوح واقْبالٍ مليح"="مثل من دقّوا على كفّه خضاب
لا مشت ما ناشت الرجل الصِبَخ"="مثل قولة علّ ما في الأرض فخ
اشهد انك يا ذلول الشط مخ"="يوم هبتي من غليظ القاع هاب
صيعرية لا عطت بأرض دخاخ"="كنّها تطرد عن المزهب جخاخ
من غنجها كبّر الراكب وشاخ"="فوق غاربها تقل يلقي خطاب
كن وبرها لأنزَعج ريش الفروخ"="وكن حمرا عينها جمرة شيوخ
وكن اعاليها ملبّسةٍ بجوخ"="او هنوفٍ لبّسوها بشت كاب
في ثناياها الرسن جاله صريخ"="مثل صيخٍ صيّخوا به فوق صيخ
مقدم العثنون تقْل اقْبال شيخ"="كبّر الله دون بيت الله وتاب
صيعرية كن اذانيها رزز"="او طواقي عسكر يوم اللزز
وكن بين دفوفها جحارة خزز"="والروادف كنها روس الهضاب
تقل يا زيد مخلوقة من قزاز"="يوم تبدي مع ظهر حزم نكاز
او كما روس المآذن في الحجاز"="كنها فوق السهل لولب دُلاب
زينة الممشى بلا مطرق تنوز"="لا مشت كنها مركّبةٍ قزوز
تسبق اللي من غثا الضولة يحوز"="خشف ريم جاه من لا صاب صاب
لأدبرت مثل النعام المستحيز"="ولأقبلت تشبه جنود الإنقليز
الحقَب ملزوز والمحْقب لزيز"="كنّها لا عقّب الراكب عقاب
رعيها بين الزباير والهشش"="من عروق سبيع للأرض المِشَش
ما تغاذوها مطرْبلة العِشَش"="كود مطعمة القلل روس الحراب
صيعرية ما رعيناها بلاش"="لين صلّع نيّها واطْلع وشاش
كود نبغاها على الطرقة هشاش"="لين يقنع من خبر نوت عقاب
الثفان مقوّسة مثل القروش"="او كفوف البيض حانية النقوش
من بنات الريح لا شاشن تشوش"="لين ما تفرق ذهاب من إياب
وقفة الغارب ولا وقفة شويش"="ما تقول الا احد سادة قريش
او كما اللي شاف فوق الراس ريش"="وان تمايل مثل من يقرا الكتاب
عينها لا حملقتها عين لص"="او على خاتم ملوك الدار فص
او كما حصٍّ لمع من فوق حص"="من تحته مولّعينٍ سمر غاب
لا عدت تسبق مطاليق الرصاص"="كنّها اللي فضّ محكومٍ قصاص
لا بلاد ولا ملاذ ولا مناص"="طقّ له مع رقّةٍ ما هي هزاب
المناكب كنّها طرقات خوص"="والشعَف كنّه مداهيل اللصوص
بترة الفخذين والساقين عوص"="كنّ بين الزور والكوع الف باب
لا طرقها الوابل الغربي تميص"="كنّها بنت تبي فصخ القميص
حالها لأرخى الرسن حال القريص"="يوم ناظر من تحت رجليه داب
تقْل يحْداها على الطُرقة شِطَط"="لا عطت خطٍّ بلا سابق خِطَط
مثل سيل أودع الوادي غطَط"="وكنّها من جورها تطرد سراب
كن سنام الصيعرية يوم شاط"="قبّة القصر الأميري في الرباط
والخفاف تْقِلْ كسرٍّ من بلاط"="والسفايف لأخفقت كنْها تسابّ
بنت نونيٍّ تموط القاع موط"="وكن اسافلها مقطّعةٍ بسوط
وان توحّت صوت راكبها رخوط"="كنّها اللي شاف ديّانه ولاب
عندها قطع الديار امرٍ بسيط"="والله يا لولا الرسن ساعة تشيط
ان تروح من الفزع روحة مقيط"="مير هيّدها رسنها لين شاب
يا نديبي سر كما حرٍّ شلع"="فوق حرّة من بطن جيشٍ طلع
مثل بنتٍ ذبّت الشيلة دلع"="يوم تطوي خرجها والكيف طاب
سر وملفاك الشجاع بن الشجاع"="ابن حامين المهنّد واليراع
نجد لا عدّوا طويلين الذراع"="من سلايل روس مرذين الركاب
قل لنجدٍ من قبل صرم الفروع"="ابو فارس ما قزاه النوم جوع
بس موحي بالإذن شيٍّ يروع"="عن قليب فيه داب بدون ناب
ما للغزك حلّ يالقرم الشجيع"="غير شيٍّ عجْز يلعب به رضيع
كل ما دقّوا حنك يقرع قريع"="من ورا المقفي تقل هابيه هابّ
كم ولد هيسٍ من اسبابه نبغ"="ونجم بن لاش من اسبابه بزغ
وكم ولد حرٍّ من اسبابه ولغ"="صافحه شيبه وهو توّه شباب
يوم قلّبته بمنظور الدماغ"="انقلب راسي وطشّيت الشماغ
وراغ دولاب الضلوع العوج راغ"="قلت هذا هو ولا احسّب حساب
(اللسان) اليا نبغ قبل النبوغ"="عزّةٍ للي يصوغ القول صوغ
وذلّةٍ للي يبي طقّ الصدوغ"="يمسي بقلبه ثلاث مْيَة صواب
(اللسان) اليا عسفت ابلغ بليغ"="وان تركته يا ابن روق افدغ فديغ
هو حلول اللغز واللقمة تسيغ"="يوم تلحقها بجغمة من شراب
والصلاة اعداد همّال النصوب"="وعدّ ما هبّت ذعاذيع الهبوب
من حشا قلبي على الحر القضوب"="احمد المختار محشوم الجناب
وعساكم من خيراً في خيراً
غير متصل
قصيدة وصف الذلول في قصيدة اللغز المشهورة للشاعر / ناصر الفراعنه
لمواضيعي
