|
رد : ابن هرسان ووقعة اللبانين
كُتب : [ 08 - 01 - 2007 ]
أخوي ابن فاهد حياك الله وبودي إنك تستقبل مني القصه كامله هذا شخص يدعى طلب من السوده حدر لنجد وله لزوم وأراد الله إنه ينزل ضيف على الشيخ بن حميد وذبح له إبن حميد وقال له: ياسبيعي منينك جاي قال: من الوديان
قال ابن حميد من وادي الخرمه وألامن وادي رنيه قال طلب من وادي رنيه وإسمي طلب من السوده
قال ابن حميد:ياخوي وش علوم عراباتكم هل الخرمه جيرانهم البقوم مايخلونهم ياكلون من نعمة الله بيشوتونهم ظهور السواني ولاهم عندكم ياهل رنيه(ابن حميد يقال إنه من الكرزان من البقوم)
زعل طلب من الكلام وقال:يالأمير بيجيك علمٍ زين والله مايقعد خيال ولابواردي ولاشاعر من سبيع ما أعلمه بعلمك
ومشى من عنده طلب وعلم أهل الخرمه ووصل الخبر للشاعر الحراب خالد بن هرسان
وقال ابن هرسان:يارجال بتجيبهم الليالي والأيام
وأرادالله إن البقوم ينزلون بين اللبانين ماعنزوا (والقبايل كانت تعنز إذا نزلت غير ديرتها)
وسبيع يقومون عليهم وهم يصبحونهم وهم يذبحون منهم 92 وابن هرسان الله يرحمه يعدهم
لأنه مايذكر في القصيد ألا لين يشوف الفعل بعينه وقال خالد ابن هرسان هذه القصيده
ياراكب من عندنا فوق ثنتين =يزهن ماكلف عليهن وزاني
شيلو عليهن واركبو ياالمعنين=وانصو بيوت مشيدين المباني
ذوي حمد ريف الضعوف الجياعين=واختص أبو هندي زبون الحصاني
وعقاب سعد اللي من البعد عانين=ليا اختلط حقبانها والبطاني
ثم خص أبو خالد برد النبا الزين=علم يماري به طلب ذا الزماني
جونا البقوم اللي من الضلع عادين= ومالوا علينا مهملين العناني
وصحنا عليهم صيحة تعجب العين=لين الصعب منهم غدا مرجعاني
خذنا حساب الجيش تسعه وتسعين=وتسعين تفاق عددهم رزاني
الشيخ راح معلق فيه رمحين=والشيخ الأخر فيه مثل الشطاني
وطاحوس خلي طايح والحشانين=غير الشريف وتسعة في المكاني
لعيون ابو خالد ربيع المساكين=سعد الرفيق وسعد من جاه عاني
ليته وقف بالرجل بين اللبنانين=ويشوف ضرب سيوفنا بالعياني
لايحسبنا طول الأيام ناسين=نشب ضو الحرب شب بياني
قل له قضينا الدين واسترت العين=دبيلة على ظهور السواني
قل له حديناهم على المرتع الشين=صوب الثلاث وراتع يم أتاني
|