[سلطان بن سعود]

بسم الله الرحمن الرحيم
هذي اول مشاركة لي ارجو ان تحوز على اعجابكم ، وهي من اشعاري ، اقول :

مشتاقن لخوة كريمين السبال * اللي على العليا تزيد اشواقها

ربع مداهلهم على روس الجبال * تسمو مع اهل المعرفة باخلاقها

ما يشربون إلا من الجم الزلال * الصافي اللي ينسجم باذواقها

وترى النشامى معرفتهم راس مال * والصفقة اللي رابح صفاقها

على سلوم اجدادهم طبع ودلال * الطيب كنه ثابت بأعراقها

هم للخوي مثل الذرا وإلا الظلال * وهم للعدا نار قوي احراقها

ربع يشيلون الحمولات الثقال * والصعب عن درب الوفا ما عاقها

حفاظة الاسرار عن قيل وقال * للسر صندوق حكيم اغلاقها

والمال قله ما يعذرب بالرجال * والخلق مقسومة جميع ارزاقها

وإلا الردي لو جا له اموال وعيال * ولو غطت امواله كثير اسواقها

ماله مع اهل المرجلة أية مجال * ما دام رجله للردية ساقها

ونطلب من الله ربنا ستر الحوال * ويغفر خطايا بالظهر ما طاقها

وصلوا على محمد عدد وبل الخيال * وعد السحاب اللي نضا براقها


***********************

وسلامتكم