((( بـــسـم الله الرحمـن الرحيـم )))
الحمد لله المعيـن والصلاة والسلام على رسوله الأميـن
أمّـا بعـد :
فقـد كانت عنّـدي قصيدة فرعون الشعر وشاعر الملاحم / نـاصر ابن محمد الفراعنـه .. اللي في قبيلـة سبيع وهي عباره عن 1000 بيـت وقد اسّـموهـا الناس ( الملحمـه العامريّـه ) وصراحه ما فضيت لها الا قبل كم يوم ففتحت دفتر نص والمقطع شغّـال وبديت اكتب الأبيـات معه واعذروني يالربع القصيده طويله مدّتهـا حوالي 50 دقيقه ووقتي ما يسمحلي لبعض الأشغال الي عندي فبديت اكتب من الدقيقه 20 يعني فيها ابيات رائعه يمكن ماسمعتها
وإليكم بعض ما اقتطفت منهـــا وارجع واعتذر منكـم ترا فيه بعض الأبيـات ما اسمعها زين لأن الصوت مهوب واضح فلذا تركتها ولم اكتبهـا ..
******************************
هذي يالربع معركه حصلت عندما غزا حاكم قطر بجيش جرّار على الخرمه ورنيه وما حولهـا طامعاً بالمكاسب ولكن شافوه السبور ونطحوه الزكور قبل يدخل ديارهم فعوّد وهو مكسور ومنهزم اشر هزيمه ويقدّر عدد القتلى من جيشه بـ 400 رجّـال غير القلايـع فسجّلهـا ابو فـارس بهذي الأبيات ..
وفي معركة ربع الأغر العظـــمــى = يــوم انكفـت ريح الجنـوب شمـال
يومن من الجوزى حثاحيث الحصـى = تشعل تحت حذو الحصـان اشعال
جتنـا مزابير الجموع مــــــــــغلّـثـه = يحسبون طق الخور طق طبــــال
وراحو وهم عقب المشان مشيّـنـه = وصار الشريـده واحدً مهـتـــــــال
يا معركه من دون سلّـي مدّركــه = تبادلو فيها المنايـا ابـــــــــــدال
حاكـم قطـر جانـا يقـود جيوشـه = و يحسبـن اسبيع عود خــــلال
وشاف راعيهم يلاوي مزهبــــــه = من فـوق برهان الجمل زعّال
بـمقـرّف المشعاب صك ضلوعـه = طاح الجمل طيحة طريح سلال
قـال المشيّـخ يا جماعه رايكـــم = فيما نبي قولو وكلّـن قـــــــال
قـال الحكيـــم اللي صليبً رايــه = يالربـع شـدّو دامهـا ترحـــــال
يالربع قوماً لافعـل راعيهــــــــا = واللـه ما تقـرب ولا تنطــــــال
قومً مثل ذولا بـعيـداً ( غـلبهـم ) = وتدويلهم فـوق المهار خبـــال
مير افلحـو ياللـــه عساهـا خيره = تـغـانمـو درب النجـاة عجـــال
قـال المقرّد من فوارس قومـــه = الا عليهــم قضّـةً واقبـــــــــال
وجونـا يبون المشرقه والمغربـه = وحـنّـا رحـانـا تطحـن الـعـيّـال
لاكن ركـز الشلـف بـين نحورهم = ركـز البيـارق في دمـاث الجـال
يـاليتهــم طاعو شور الشايـــــر = ما لبّـسـو فوق الجداد سمـــال
*****
وهذي يقصد بها ابو فـارس معركـة البــدع اللي بين بني عامر والعزّه من سبيع والأتـراك
وفي فتنة الحاير تطـــول اشنابهــا = قوماً وقوما مالها مزهـال
يومن جنـود الترك تظرب دونّــــــــا = دق الــنـثـيــر ونوّخ الحمّـــال
لاكن شرايدهـم شمــال اللاجـــــه = اوجال الظـليـم اللي حداه ظـلال
*****
وهذي الأبيات يشير فيها ابو فارس إلى معركة الحنـو اللي بين القريشـات من سبيـع وابن رشيد وربعه من شمّـر
والحنـو يوم الحنـو يوماً عـالمــــي = ألـيـا تعزويـــنـا عقب مصـــوال
نـروح في سـوق الفنـا ونرخصـهـا = صـم الرمـك من ظـربنـا عـيّــال
*****
وهذي الأبيات يقصد بها اهل العـــشـر
ونقــرة سنـام اللي شمـال العــارض = عشـر الركاب الداحمه الأغـوال
قوماً على ثلاث آلافً عدّهـــــــم = قومـاً لبـن ثامر وابن صـــــلال
ياما عثر في جمّـعهم من طيّــــب = وخلّـي على خـد الـثرى مـظــــوال
*****
وهذا البيت يشير به ابو فارس إلى مناخ السبيّـه الذي جلّـو من ديارهم الخوالـد من بعده
ويــوم الدهـنـا منـه الخوالـد جـلّــيـو = قازيـن نجدً منبتاً وعبـال
*****
الأبيــات واضحـه ..!
لنـا على الوديـان سلّـطة دولـه = يومن كلً دون حقّـه حال
لنا من جرب لين هضبا ال زايد = ومن خنثـل إليـا شامخ الأقذال
وجينا على العارض واخذنـا ملحته = لاقرب عمً ولا قرابة خـال
من البرابك لتّـريبي حدّهـا = وحجلان حدً ما عليه اشكـال
ومن جو سـاقانً لخشم العان = نرعى البكـار المطربـات ألحـــال
مايوم علّـقنا على احد العاني = نرعى ديار الظـد غصباً غال
*****
كفوفنـــا سقـوا الغيــوم ليا امطـــرت = وسيوفنـا السم الـــــذحاح نكــال
حنّـا بني عامر سلايل صعصعـــــــــه = فالأصـل عدنانـــــيّـة الأنســـــال
لنا فالعصور الجاهليّـه مسهــــــــــــم = على كل من طال وتطاول طــال
حنّـا سبيع اولاد عامر صعصـــــــــعـه = هـاك الصميـدع ضـــارب الأمثـال
نرجـع إلى اربـع فروعـاً وافيـــــــــــه = وشجر الكرام يطول ما ينطـــــال
*****
حنّـا مدلّـهـة القصير بظـلّـنـا = ماهوب ظل العوشزه مذوال
قصيرنا في حلّـته ما دلّـتـه = كف الضديد وكلّـة الأرزال
عـاماً وشهرينً وعشرً فوقهـن = يامن بهن قلب الدخيل الذال
واليا ظربنا واحدن ما يسلم = ظربً على الهامه ودوس نعال
ماناخذ الصاحب على زلّاتـه = نرفا من الجار القصيــر خمال
*****
حنّـا هل العرفـا مقابيس البــلا = يوم الحمر يستفحل استفحال
على الخوي ما ننجرف لحميّـا = حق الخوي ندوبلـه دوبــــال
يرعى بذوده قبل ترعى اذوادنا = فالخايع المسهول والمرقـال
ننـدى ليا شحّــت مجاويد العرب = فالدرب والطرقه والأستقبــال
اهل سفرةً تندى ليا شــح الثرى = وقول شلويهـا ينبه الجهّــــــال
*****
في صحصح الجوفـا نحوم الهيجــا = حومة حرارً في سما عيطــال
بالشلـف و السمر البلنز المهّلكــــــه = ونويفيعيّـاتً لهن زلـــــــــزال
صلنـا عليهم صولتـن مخــــــبـــوره = صولة سباعً داهمن ظـلّال
*****
وفي يوم حوقـان العظيـم الجاري = يومً مزعوج الــــــدمي وشّـــــال
تركً مخيطت النواظر قدّمهــــــــم = رخم الجمــوع منوّخة الأصـــعال
معهم مقاديم القبايل قيّفــــــــــو = بالماكري والمصمعي شيـــّــــال
لاكن ظرب الزار بين جموعهــــــم = ضرب ال فوس في محطبً سمّال
سلح البــوارد درّجت من دورهـــا = للـنـــار قــاز وللشنــب فتّـــــال
*****
ومناخ الرضيمه يوم صاح الصايح = والموت فوق رماحنـا برغـــال
من راس كل مصمّـلً ميرادهـا = كما ورد ضمياناً على سمّـــال
*****
هنا يذّكـر بعض فرّيـس سبيع
حنّـا سبيع اهل الحســام المحلا = ما عام من عامً وهل هلال
منّـا ليا عدّو شغاميم العرب = خيالةً تضربّهـا الأمثــــــــــال
مثل ابن ضاري والعمى وقريمط = وشبيبنا الدفّـار حامي التال
وابن مشاري وابن هملانً جري = وعضيـب والحظبي عما العيّــال
وابرق نفيشً هو وبن قاعد = وابن العماني والصيـيـفـي جال
وعسّــاف وصنيتــان هو والأزمــع = ربـعً على ورد القنـا ميّـال
هم وابن جفران وولد الأدغم = وابن شوّيـه وربعً على مـا قال
وحجاب الأول ثم حجاب الثاني = ما ضاع منهم حق لو مثقال
وزامل ابن سليـم وابن هديــد = والشيخ ابن قطنـــان طيب الفال
وابن المليحي دغيّمً هو يّـا = ضرمـان والروس الطوال طوال
وابو شدق مسحون البلا في كفّـه = وابن جروه ليا كبرت الأقــوال
وبجران هو والوايلي واللي معه = اهل العشر في جيلنً جلتها جيال
وولد الكبودي ناصرً والجبري = وابن رميزان وابن مثقال
ماجبت ذولا حقرةً فالباقي = لا والذي خلا الدقاق جلال
نماذج استشهدبها لا اكثر = والعذر لاامتد الكلام وطال
حيث ان سبيعً مثل ذولا واطيب = قبيلةً تسجد لها الأبطــال
ما تنحصي فرسانها واعيانهـــا = لاشك للتأكيد بالأقوال
*****
وهنــا يتكلّـم ابو فـارس عن ( الوفـــــا وسبـيـع ) لأنهــا مقرونـه بعـض .
وعند الوفى ياما غلبنا وافي = ربعً على سرج العتال عتــال
نطرب على فعل الوفى من داني = يوم الردي عنها يجيه ازجـــال
(( مفــرّج المذكــور اكبـر شاهد = خم ولده بمصقّـلاً مجــــــــــوال ))
(( ودون المخوّه زاهداً بالثاني = ويشهد عليه محمد وما قال ))
(( وعلي وما سوّا فـبـن طوالـــه )) = الروح تفنى والفعـل لازال
(( وملحة الجربوع ناخذ حقّـهـا )) = ماهي علوم الزور والطهبـــال
{ واللي زبن قبـر الصييفي خلّـي = عليه من ستر الإلـه اسبــــــال }
( ويوم شلوي ظيم الليالي طقّـه = جبناله الشرف البكار اشكال )
قوماً تخاو مع خطيـر الفرجه = خوّة نقا ما جاوبت لخمال
وسربتينً برقن في سلبهم = راحن عشا لذيابة الأسهــال
عدّيت عشرينً صباحاً وافتر = (( وعسّـاف لا يهزم ولا ينطـال ))
وفي حومة الهيجا تكود فعولنا = لا دلدلو حبل الدرق دلدال
مـنّـا هل الخطّيـن وقتً ماضي = واللي تعدّا الخط ماله تـال
حـنّـا هـل ( الـردّات ) واهل الدجّــره = ندوس المنايا عند الأستهلال
ثلاثةً دون المظاليـل ازمعو = دش الخطر والقلب له بهلال
يومن جيوشاً من الأعادي قيّفــت = جموع ارزمت مثل الحزوم ثقـال
وراع الأبرق على وجه الحسا = ما همّته تركً عليها اوشال
ومنا هل الجذعين لاعدمتهم = يا روو دون الدخيل سلال
(( ومنا ثماناً عدّهــــا قبلي فهد = نهار عدّا والرجوم اطوال ))
وما قال ابن حثلان ثبتً للوفــا = سوالـف لسبـيـع حرز وجــال
وحنّـا مقر الجود من ماض العهـد = وفعـــل النشامـا عين الأستدلال
( منّـا الكريم المكرم ابن جويريه = نبعً من الصافي مهوب غســال )
(يسعى على خضر الجريد المطّرق = بالما على شعث السواني موال )
(وان بان نجم القيض سبّـل عينتـه = للحضر والبدوان والهشّــال )
ومعشّـي الشجر من لاسمع فيها اصقـه = يـبـيـلـه مكبّـر صوت واسترسـال
في ليلةً هز العجاج غصونهــــا = وهو من الدنيـا فقير الحـال
يصــرخ ببـنـتـه شوفي اللي جانـا = قالت يبه شفت اعشره وانغال
فزع وذبّـح للغصون معيده = ويقدّم صحونه سوا ولحــــــال
(( ومنّـا ابن قطـنــان نديب المكرمـه = بـيـتً عليـه من الشحـم ما هــال ))
سوالفً عدّيتهـا وابديتهـا = ماني بمجامل ولامجّـمــــال
يطربلها ولد الكرام معرّب = ولّا تراها تزعل الدغفـال
ماتزعل الطيّب وتزعل غيره = سلالـة الخبّــاز والـفوّال
اقولها وانا اللـذي من لابه = فيهم حفظت المدح بالأمثــال
اربّـّـهـا تبقـى مسار وذكرى = لامرّت اجيالً تلتّهـا اجيـــال
ومن قبل لاانسى يا نديبي عجّــل = من دار ابويـه عجّل الروحــال
(( قوطر على الخرمه ونوّخ فيهـا = قدر ساعةً كنّـك على شيشـال ))
ثم مد لأجراس الذلول وعدّهــا = ( وروجم حدر للرمـــاح حط رحـال )
( هذي الرساله لازم ان توصـلـهـا = كافة سبيع شيبانهــا وعيـال )
ياويش اسوّي في مصيبً صابني = واصبح صويب الساق ماله صـال
لي حصّـةً في حصّـةً ملمومـه = من دونهـا حصّـه ولا تنطــال
عليها ليا هبّـت ذعاذيـع الهوا = سلامي وما نش المحيل خيـال
هذا الكلام اللي يقولـه ناصر = بن محمد والرميحي تال
في ترثة الحي الغضيّـاني = رجع كما رجّعت لأسدوها الأشبال
( من لاد فرعـون مطاليق اللحــا = من الزكــور مكمّلـة الأقــوال )
ولمنسب سبيع العزيزه ينسب = اهل الـبـيـوت اللي رففـهـا ثقال
والخاتمه ما لاح برّاق الحيـا = في مدّلهـم المزن يوم يسـال
ازكى صلاةً للنبي الهاشمي = ما ناحت الورقا على الأمثـال
وما مال مشرقها على مغربهـا = وماهل عشّـاق على الأطـلال
***
واحـب ان انـوّه انّـه فيه وقعـات كثيـره ذكرهـا ابو فـارس في هذي الملحمـه الرائعـه ولكن لم يتسنّـى لي ان اكتبها لطول القصيده وطول وقتهـا
والغريب المحيّـر انّـهـا لم أخـذ حقّـهـا من النشـر مع العـلم انّهـا ( قصيده تعتبر من الملاحم الشعريّـه ) والتي يجب ان يحتفظ بها التاريـخ و ان تصل إلى كل سبيعي
عمومـــــاً حاولت ان اوفّـي ما علي وان اكتب لكم بعض ما جا فيها ، فبيّــض الله وجهك يا فرعون الشعـر ويا شارع الملاحم ويا شاعر مضـر على هذي الجزله الرائعه والتي تكتب مــــاء الذهــب
اتمنّـى مٍـن مَـن له علاقه بٍـأبو فـارس ان يبلغه تحياتي وشكري وان يحب خشمه وراسـه نيابةً عّـي
تحياتي وتقديــري .
غير متصل
