مرتاح ومريح ولا اشكي البين * وذي حالتي 24 ساعة .. جديد الشاعر راكان بن بدن

[شافي بن عميش]

ياناشدٍ عنّي بعد غيبتي وين ؟ = وتسأل عن أسباب البطا والقطاعه
أن كان تسألني بعد زل شهرين = فاخذ الجواب اللي يسرّك سماعه :
مرتاح ومريّح وحالي كذا زين = على مدار اربع وعشرين ساعه
اشفق على عِرف الرجال الميامين = وعن رفقة الهافين عندي مناعه
لاصرت متعافي 00 ونهجي على الدين = وارجي من الله الرضا والشفاعه
ومساندٍ ربعي على العسر واللين = ومرضٍ أبوي 00 ومفتخر بالجماعه
ماهمّني لو يرهق امتوني الدَين = المرجله والدِين راس البضاعه
وأغلا من كنوز الذهب والملايين : = كنز الرضا والعافيه والقناعه
وماغير ربّي 00 ثم ولاة الحرَمين = اقول لامن قال سمعٍ وطاعه
صحيح ربّي خالق الناس من طين = ومرّوا بتسع شهور قبل الرضاعه
لكنّ ميّز بينهم فالموازين = وكلٍ حسب عقله ونجدة اذراعه
مايستوي قدر الردي واحمر العين = ولايستوي طبع الحيا والبشاعه
مايقهر الرجال ياغير ثنتين = وماله على تعديلهنّ استطاعه
لاصار وافي شور وفعول ويمين = وطاح بزمن مايعترف بالشجاعه
المال كم وطّا ونزّل سلاطين = وكم طال به قاصر وزاد ارتفاعه
هذي تصاريف الزمن بالبراهين = وكلٍ يترجمها بحسب إطّلاعه
والحين اضنّك فاهمٍ حالتي زين = قل قالها راكان ماهيب اشاعه :
مرتاح ومريّح 00 ولا اشكي من البين = وذي حالتي 24 ساعه

جديد شاعر العرب راكان بن بدن ,,,

[فواز علي الروقي]

صح لساااااااااانك لاهنت
قصيده شامخه تقبل تحياتي

[ابـــن مهـــراس]

صح لسانك ولسان شاعرنا
واتمنى ان لايذبح موهبته الشعريه
وينشر قصائده لنا ولكل الناس