دسمان السبيعي وردي عليه

[سلطان بن سعود]

بسم الله الرحمن الرحيم

هذي قصيدة للشاعر الكبير / دسمان بن مناحي السبيعي وردي عليه :

ذعذعني الغربي وأنا خاطري زين * في مرقب جد الثمامة وراها

روس الطوال مشلخات الصعانين * ارتاح لامني بديت بحجاها

تطلقت ملد الهجوس المساجين * ما غير اجي في شفها واهجاها

مر لها بين الضماير بساتين * ومر شبوب في الضماير لظاها

تطلع مطاليع تكود الشياهين * (000) الحرار اللي بعيد مداها

خيرتها في المدح قالت تبي مين * ما كل ممدوح يواكب هواها

قالت امدح لي روس ربع عزيزين * ترفة شيوخ طيب الله ثراها

عدي وجدي وامدحي في آل بوثنين * هاك البيوت اللي يذري ذراها

تاج نفاخر به على الراس والعين * يوم القبايل تفتخر في امراها

منصى بعيد الدار ماضي وذالحين * ومن حدته شهب اليالي نصاها

روس الشيوخ الشايخين المسمين * اللي على اثرها تشيخ اقصراها

وساع الصدور مكبرين الدواوين * طوال مشاحيها عزيز نباها

تسري مكارمها على العسر واللين * ومن جا من شيوخ القبايل لقاها

كسابة الطالة على الطيب ضارين * ومن ذاق صحبتهم دياره نساها

يرفون خلات الاقاصي والادنين * فضايل يمحى الدهر ما محاها

شر الحفيف مرجحين الموازين * تخشى الطوارف غيضها من عياها

عجلين في حال وحال ثقيلين * باشوارها تمشي على ما طراها

يوم الحروب ويوم خوض الميادين * ترعى النزايع تحت فية عصاها

واليوم نقرا في الجرايد عناوين * ناس تناوط للعلا من غباها

وقت تصيقر فيه حتى الكراوين * قامت تكافخ وارتفع مستواها


***************************8

وهذا ردي عليه وان شاء الله إني وُفقت :

بديت باسم مكون الكون تكوين * اللي بسط سبع وسبع بناها

اللي لوجهه يسجدون المصلين * غفار زلات النفوس وخطاها

من بعدها ياهاجسي دور الزين * واكتب بيوت يبتهج من قراها

بيوت جزلة ما يجي بينها الشين * فيها المعاني واصلة منتهاها

برسالة عبر الهوا للميامين * مع الهبايب سايرة في سماها

رسالة لابن الكرام الحشيمين * على العلوم الطيبات يتباها

الشاعر المعروف من سنين وسنين * صيته وصل كل المدن مع قراها

سلام يارع الوفا يااحمر العين * جتنا قصيدكم وهذا صداها

دسمان يا نسل الرجال الوفيين * ربع على العليا تسارع خطاها

ربع مواقفهم مع الشدة تبين * والرجل منهم كلمته ما ثناها

وفعولهم معروفة في الميادين * ان قامت حروب شديد لظاها

تصير وقعتهم كما وقعة حنين * وسيوفهم تنصى نواص احرباها

سقم العدا لامن غدا الليل ليلين * ونصارة المضيوم لامن نخاها

متوارثين الطيب وفي الطيب ماضين * على سلوم اهل المعزة سراها

لاجيتهم تلقى رياجيل ذربين * رحابة بالضيف لامن نصاها

يفدون ابومناحي جميع الرديين * واللي على النمات نفسه رماها

اللي يحبون الوشايات غادين * ناس تطيع ابليس يومه غواها

ومشكور باللي تذكره في آل ابوثنين * دسمان ياللي كلمته قد وفاها

وختامها صلوا على مبلغ الدين * عداد براق يلوح بسماها


******************

وسلامتكم

ملاحظة : ترى الكلمة اللي بين قوسين في قصيدة دسمان ، أنا ماسمعتها زين من الجوال ولا بغيت احط شي

من عندي ، والمعذرة اذا كان فيه خطا مطبعي .

[خيَّال الغلباء]

أخي الكريم الشاعر / سلطان بن سعود السلام عليكم ورحمة الله وبركاته وبعد : صح لسانك وسلم نبضك وبنانك وإعتلا شأنك وصح لسان أبو ثواب شاعر القبيلتين الكبير / دسمان بن مناحي المحمدي قصيدتين جميلتين ومعبرتين وفقكما الله لما يحب ويرضى والنعم في اّل أبو اثنين والله يعافيك ويبارك فيك ويجزاك خيرا هذا وتقبل فائق الشكر والإمتنان مقرونا بجزيل المحبة والإحترام مع خالص التحية وأطيب الأمنيات واسلم وسلم والسلام .

[ابو سعود 99]

الأخ سلطان سعود صح لسانك ولسان دسمان ابن مناحي وبيض الله وجيهكم جميع

[(جزاء السبيعي)]

صح لسانكم وعلى شانكم

بيض الله وجيهكم لله دركم

مبدعين

اخوكم

جزاء السبيعي

[سلطان بن سعود]

السلام عليكم
صحت ابدانكم وبيض الله وجيهكم ، وماعليكم زود ، مشكورين على ردودكم

[فواز علي الروقي]

ابو سعود صح لسااااااااااااااااانك وصح لساااااااااااااااااان الشاعر
لاهنت