منتدى الشعر الشعبي والنبطي ( شعراء الشبكة )قصائد نبطية شعراء قبيلة سبيع الغلباء و الخليج ، دواوين شعرية بالشعر الفصيح و العامي بأجمل الكلمات وأجزل الأبيات
قالوا الوقت أختلف قلت لله مختلف = تختلف الأجيال والوقت مافيه إختلاف
الأختلاف يصيب الإنسان لامنه أنحرف = والأدواك يعترضها معاصي وأنحراف
والتغيير صار لوّل طرف وآخر طرف = والسنين تدور والوقت ماعنده إخلاف
تختلف الأجيال في مابقى واللي سلف = ومن عرف وزن الثقيله عرف وزن الخفاف
والكذوب ليا كذب مايصدق ولو حلف = لو جحدها في البدايه مصيره الأعترف
لو جحدها فالبدايه مصيره يعترف = يحسب أنه في مسيره يشوف ولا يشاف
ولو يطول ما انكشف مصيره ينكشف = كل شيٍ بالنهايه مصيره للأنكشاف
وكل شي بغير ثبتان رمي بلاهدف = كل زرع بغير مويه مصيره للجفاف
كم نفوسٍ من ترفها مضيعها الترف = والضعافه دايماً تطرح النفوس الضعاف
والجميله بالردي مثل كد بلا خلف = مثل شخص حج وحجّه بلا سعي وطواف
ومن مشاله درب ممنوع عوّد ما أنتصف = لو بغى درب الحرافه يضيّع الإحتراف
ومن تَمدّح بالمَصَارف وهو ماصرف = مايفرق بالليالي والأيام العِجاف
والبخيل بخيل ماله معرّض للتلف = حطّه الله في حياته يضيف ولا يضاف
ومن عرف ميزان نفسه وميزان الشرف = حطّه الله في حياته يخيف ولا يخاف
والمراجل تنوخذ بالمواقف والصدف = و الحظيظ اللي كسبها بحكمه وأكتشاف
من يكتسب خمسة مواضيع كسبان = ياكبر حظ اللي يحظّه كسبها
خمسة مواضيع لها شان واحسان = تتعب لكن الفايده في تعبها
واللي كسبها يعتبر شخص ربحان = لو تنجلب بالسوق محد(ن) جلبها
ولو تنشرى محد(ن) قدرها بالأثمان = ولو تنطلب بالجاه كل(ن) طلبها
ولو تنوزن ترجح على كل ميزان = ولو تنوخذ بالحرب محد(ن) حربها
خمسة معاني كلها ترفع الشان = ولو تنخطب كل الجميع اتخطبها
العافيه والستر في كل الأحيان = يازين نفعتها لمن يحتسبها
وبذل الكرم والجود في كل ميدان = ومبدأ الشجاعه حين يبدي نشبها
والخامسه بالصبر لو كان ماكان = والصبر مفتاح الفرج من كربها
خمسة معاني تشتمل خمسة أركان = منها النفوس الناس يكثر عجبها
لاصار مبدأ الهرج من قلب ولسان = مبدأ القصيده ينعرف من سببها
قصيدة(ن) تنشر على غير عنوان = منيحة(ن) من مرّها يحتلبها
ولاينبني بيت(ن) على غير سيسان = خيمه بلا عمدان محد(ن) نصبها
ولا فيه نار(ن) بلا رماده ودخان = والنار ولعة نارها من حطبها
وانا أشهد ان المال قوّه للإنسان = خلّا قشاش الناس ترفع نسبها
وترا الشجعاه والكرم دايم أخوان = ميّر الظروف أحيان غصب اتغلبها
والدب مايقرص على غير نيبان = أما العقارب قرصها في ذنبها
والهرج يحصل فيه زود(ن) ونقصان = وطرق النفاق اليوم ما اكثر عربها
وبعض القصيد اليوم كذب(ن) وبهتان = ياكثر هرج الناس وياقلّ أدبها
ولا أحد(ن) يقول أنا عن الحق غلطان = وصعب تصيد رضى النفوس وغضبها
وكل(ن) يقول أنا تراني كحيلان = يبغى يرقع كذبته لاكذبها
غير متصل
