[راعي مرات]

تحياتي وتقديري للجميع
آمل أن تتسع خواطركم لهذه الحروف0000

الحـر يزكـي.. والدجاجـه.. دجـاجـه=وماني علـى بعـض المقاريـد مجبـور
الضـرس قلـعـه لا تـألـم عـلاجـه=لا صار مـا ينفـع معـه طـب دكتـور!
وحكي القفى في الناس عيـب وسماجـه=واللي يتتبـع عـرض الأجـواد مثبـور
(نارد) قرا ح المـاء ..ونتـرك هماجـه=هـذا لنـا مبـدأ.. ومنهـج ..ودستـور
واللـي يطفـي فـي الغـداري إسراجـه=لايحتري قمراء ..ولا يرجـي النـور !!
تـراه يضيـع صيدتـه فـي عجـاجـه=لا يسمع الناصـح.. ولا يأخـذ الشـور
والكـل يبخص فـي الشدايـد خراجـه=لا نشبت اللقمة من الغبن فـي الـزور !
والحـظ لابـان الـردى فـي حجـاجـه=أصبـر مـدام الصبـر ياخـوي مقـدور
الله خلـق كـونٍ وسـيـعٍ.. فجـاجـه=والعبد لو يطـرد وراء الـرزق معـذور
و(راع) الرفـيـق ولا تعـكـر مـزاجـه=خلـه سعيـدٍ دايـم الــدوم مـسـرور
كسـر الخواطـر مثـل كسـر الزجاجـه=نفس البشر دم.. وأحاسيـس.. وشعـور
واللـي يتصـدد مالكـم فـيـه حـاجـه=يالله عسى إللي يدور الستر .. مستـور
وحذرا تصير لبعض الألسـن (علاجـه)=بعض البشر يحلف.. ويشهد ..على الزور
والتمـر يعـرف طيبـه مـن خمـاجـه=ماجـور ياللـي تدهـل الطيـب ماجـور
الـواحـد القـهـار راعــه ونـاجـه=الله يكافينـا مـن الضـيـم والـجـور
يقولـه إللـي قاسـي الوقـت عـاجـه=صابر وهمـه داخـل الجـوف مقبـور!!

راعـــــــي مـــــــرات
عبدالرحمـن بـن عبـدالله المجلـي السبيعي

يسعدني مروركم على موقعي الشخصي
www.almojaly.com