قصيدة رثاء في ابن العم حمد بن فهيد
الحضبي السبيعي المدينة المنورة
لا والله اللي راح ابن عم ونسيب
شخص عزيز له معزه واحترام
لا ينقل النمه ولا حتى يعيب
راعي هلا يامرحبا وازكى سلام
ابو فهيد الشهم والرجل اللبيب
انشهد انه من رفيعين المقام
في هرجه وسوالفه لبق وحبيب
كل يعزِّة من بني خال وعمام
تواصله دايم على عزه وطيب
ولا تسمع الا ياهلا وحلو الكلام
حمد حمد في الفعل و الفزعه عجيب
حكيم راي ويعتبر ضمن الكرام
تبشر بعزك كان جاك أمرٍ صعيب
انشهد انه من رياجيل حشام
وإن كان خاويته فهو نعم الصحيب
خفيف نفس وشغل فنٍ واهتمام
ومن طيب ذكره بين ربعه والأجناب
سمّى على اسمه كل شهمٍ ومقدام
لعل له في جنة الرحمه نصيب
ويغفر ذنوبه يوم وقفات الزحام
خلَّف رجالٍ كل واحد مايغيب
فهيد وحاتم في محله بانتظام
وفهد مكانه يكمل الدرب وقريب
مسيرة نفخر بها بين الانام
كلٍ يعزة شامخٍ سقم الحريب
والله يرفع شانهم في كل عام
عبدالله بن سعد الحضبي السبيعي