حسبك الله يا فتون المراميقي= كيف تجبرني على منهجٍ عفته
ولّعة العشاق حلو التذاويقي= كم تعرض في طريقي وخالفته
محكمٍ دونه قفول الصناديقي=وان كبر بعيون غيري تضاعفته
غير فنجالٍ على فكة الريقي= نكهته جتني بها الريح ناسفته
مع عبير أزهار عشبٍ مواريقي= ومع شذى سحر الطبيعه وحايفته
نسمة الباكر وشمس التشاريقي=غب سيليّةٍ من الوسم جارفته
يا ترى نكبات وإلإ توافيقي= ليتني ما كان بالدرب صادفته
سهم حبه خش بأقصا معاليقي= يوم شرفني بشوفه وشرفته
صابني ما قاله احدا العشاشيقي= سالفة ياعين لك بالهوى لفته
وأصبح العاقل يجر الطواريقي= مع رؤمنسيات طيفه وعاطفته
صدفةٍ من دون موعد وتنسيقي= حطة الريشه على الوتر وعزفته
يا عساها ما تخون المواثيقي= أشهد انّها تلّت القلب وخطفته
سيّدة كل الغنادير وتليقي= في مقامً بأعذب الشعر وصفته
وصلها غاية مرامي وترويقي= والجفا يا شين سيفه ومنسفته
في مزاياها عن الغير تفريقي= التميز والوقار متلحفته
درةٍ ما حصلوها الغواريقي= صعبةّ المنوال والشك حاذفته
ما تلفت في عيون المطافيقي= ملّبس العفه ماهيب متسلفته
من بيوت أهل الشرف والمطاليقي= عزوّة اللي كل بيضا محالفته
تحت توقيعي وختمي وتصديقي= غيرها لو شافه الشوف ما شفته