قصائد للشاعر / مهدي بن سعد ابوليل الصندلي
كُتب : [ 04 - 08 - 2009 ]
السلام عليكم ورحمة الله وبركاته
الاخوه اعضاء وزوار منتديات سبيع الغلبا
هذه ثلاث قصائد وصلتني من الاخ الشاعر مهدي بن سعد ابوليل
وحبيت أنقلها لكم وأنقل معها سلام وتحيات شاعرها لكم جميعا
(هجوس الصندلي)
جعل السحاب اللي نصوبه مزابير = يمطر على الحره وضلع الحباشي
عرضه على رايان وام الحثارير= وينحى على الرميله وذيك الفراشي
راس القرى منزل ربوعا مشاهير= صنادله ودخيلهم مايناشي
أفخر بربعي في نهار المحاضير= حرابنا نعطيه بالفعل كاشي
يوم الجهل من دونها بصنعة الزير= ربع ٍ على دوس المعارك عطاشي
يوم أشهب البارود جاله معاصير= كم شيخ قوم ٍ داه منهم خراشي
ياما حدو من دونها من طوابير= بصنع الفرنجي قبل يرد الكلاشي
في راي اخو موضي بعيد المشاوير= ابرق نفيش اللي على الطيب عاشي
شيخ ٍ على الشيخه براسه صعاطير = علم ٍ صحيح ولاحصل به غشاشي
هاضت هجوس الصندلي بالتعابير= ربعي حزامي لاصفن المناشي
أحسب حساب الوارده والمصادير= وافخر بربعي لو يطول النقاشي
والويم في حكم اللي عسى فالهم خير = إبن الامام اللي على الطيب ماشي
في مدح ابو متعب تزين الاساطير= شرايد ٍ مدهالهن وسط جاشي
وختامها مني تحيه وتقدير = على النبي إعداد وبل الرشاشي
قصيده مهداه الى الشيخ / عبدالله بن رميزان شيخ قبيلة الوزارين
الصندلي قال قول ٍ فيه بسم الله = ندوادر الشعر تبدأ في هناديبه
يستاهل الطيب والله مثل عبدالله = إبن رميزان فعله وافين ٍ طيبه
أنا أذكر الله عنه واقول مشاء الله = تفخر به سبيع والطيّب يماري به
شيخاً لياقام في القولات بامر الله = عند المعازيب ماتقصر مطاليبه
جاب المزاين وكل ٍ قال عز الله = شيوخ اهل نجد من طيبه تهذريبه
شيخا شهر بالوفاء والعلم عند الله = يالله عند الولي زين مطاليبه
لزاره الضيف قال الضيف ضيف الله = الضيف لاراح كاملة ٍ مواجيبه
يضحك حجاج ابو رمزي عليه الله = ترتاح للشيخ لازانت تعاجيبه
بالعلم والطيب هو اللي عطاه الله = تعيش ذيك الشوارب لو كثر شيبه
في وسط رنيه ماشفنى مثل عبدالله = حتى الرباعين تنشد عنه من طيبه
وصلاة ربي عدد ماحج بيت الله = على محمد ودين الحق نمشي به
الاخيره وهي مرثيه في الشيخ / عبدالعزيز بن جامع الرويس...
امير الفوج رحمه الله وإهداء الى ابنه جامع بن عبدالعزيز الرويس
انا اشهدإنك يابن جامع فقيده = قاد اللواء من عام خمسه وسبعين
زحزيح قوم ٍ والمساعي حميده = يكرم ضيوف البيت لوهم ملايين
جعله مع الابرار نفسه سعيده = لعل ابو خالد مع الحور والعين
شيخ ٍ من الروسان قرم ووليده=له وقفت ٍ تخشاه رؤس السلاطين
جانا الخبر عبر الفضاء والجريده =قمت ووقفت وراحت العشر ثنتين
خلف عيال ٍ في الملاقا عنيده = ليا جاء نهار ٍ مثل ثور البراكين
جامع جمع كل العلوم المجيده = عساه يسلم من عيون الشياطين
شيخ ٍ ولد شيخ ٍ علومه مفيده = شيوخ برقا كلبوهم سلاطين
الطيب في العتبان ساس وعقيده = نعم ٍ بكم يامرجحين الموازين
من فضلكم ياموصلين القصيده = عبر الجهاز وتاصله طرفة العين
الشاعر/ مهدي بن سعد ابوليل ج/ 0553142736
|