[مطول الغيبات]

ابو سالم الريـــــس


تسلم وصح لسان شاعرها .

يالله يامنزل تبارك والعلق هي والصمد = يا مهلكٍ فرعون وأعوانه ومهلك قوم عاد
يا الله دخيلك يا الولي ماعاد به ظهرٍ يشد = ما عاد به ياخالقي عده ولابه من عتاد
الآدمي في دنيته يعيش في هم ونكد = قضى حياته بين تصبيحة سهم والا هجاد
يشوف سهمه هو رقا والا نزل والا جمد = هو زاد سهم السامبا والا سهم لجين زاد
والناس صارت كلبوها للتوافه تجتلد =ما ادري غباء والا جهل ما أدري ولكن الوكاد
تشوفهم في صف واحد عند بنك المتحد = والا تزاحمهم ووقفتهم على بنك البلاد
وأنفوسهم صارت ضعيفه كلها ظلم وحسد = ما فيهم اللي من حياته قبل موته استفاد
اللي يسب بصاحبه واللي على الثاني حقد = واللي نشب في عروض خلق الله تقول انه قراد
مقابلين الشاشة اللي كلها خبث وفسد = الشاشة اللي ما ملاها الا مروجة الفساد
يهيضهم منهو يغني بأغنية يابو حمد = ويطربهم الفنان خالد أو رنا والا جواد
ويتابعون أخبار ماريا على محمد سعد = ويا سعدهم لا جاء مسلسل حب لمحمد فؤاد
ويشجعون النادي اللي فاز للقمة صعد = وكم سجل اليوم النصر في وسط قول الإتحاد
مبحلقين عيونهم يالله عساها للرمد =ويالله عساها يثر فيها ملح ويثر الرشاد
ما كنهم شافوا على الشاشة شعوبٍ تضطهد! = شعوب يرثى حالها للموت والعزره تقاد
شعوب يسلب حقها عنها ولا واحد نشد = من شوفهم واحوالهم يبكي ولو حتى الجماد
هذي عجوزٍ تنضرب والعود معها ينجلد = والا العذارى تستحي والطفل يقتل في المهاد
بيوتهم من فوق راس العود والحرمه تهد = تسلب أراضيهم علن ولا لنا الا الإنتقاد
شبابهم وارجالهم وأطفالهم راحوا بدد = شعوب تحمل راية الإسلام في العالم تباد
يا لعنبوهم كان ما فيهم ولا واحد صمد=ما فيهم اللي هبت عزومه ونادى للجهاد ؟
يومن ولد الخايبه قصر وعند امه رقد= وصار أكبر همومه طرب ويفصل ثيابٍ جداد
وين أنت يالذيب العزوم اللي بهداتك أسد ؟ = يا اللي لجرح أمة محمد سترها وأنت الضماد
وين النشاما والجموع ووينها طيور الهدد؟= اللي يشبون الفتيله من على راس الزناد
وين النفوس اللي تردد قل هو الله أحد ؟ = وين الرجال اللي بفزعتهم يفكون القياد ؟
وين الشيوخ اللي بحنكتهم يحلون العقد ؟ = وين القبايل والأصايل وينهم أهل الشداد ؟
غرتهم الدنيا وشل نفوسهم طول الأمد ؟= هم ما دروا أن البشر والخلق تاليه النفاد ؟
والمشكلة جتنا المصيبة من ذراع أبن البلد = اللي طعن أرضه غدر من زود جهله والعناد
جماعة الإرهاب والإفساد جونا بلا عدد = توالدوا ما كنهم الا من اسراب الجراد
كلن قبس ناره على داره بحسب المعتقد = لكن وبفضل الولي نيرانهم صارت رماد
أفكارهم متغيره وعقولهم فيها سدد = والله ما أدري منين جابوا ياعرب هالإعتقاد
أنا أشهد أن عقولهم يا ناس من جنب القدد = يا الله تفنيهم يا مفني بعزتك ذات العماد
هم مادروا اللي يضرها في يوم مابعد أنولد؟ = من دونها اللي لأمنها ما لذهم حلو الرقاد
والغافل اللي في حياته لا ركع ولا سجد = يجيه يومٍ يلبسن البيض لفراقه حداد
أغنم زمانك وأغتنم دنياك يامال السعد = صل الفروض وعدل أوضاعك بكثر الإجتهاد
وأن كان خانتك العزيمة والعزم طاح وبرد = فعرف ترا وأن طالت الدنيا فـ لله المعاد
سو ماتبيه وترغبه بس الوعد يوم الوعد = يبان فيه الوجه الأبيض صدق ويبان السواد
يومٍ تعود لخالقك سبحانه الفرد الأحد = ما فيه لا فرصة ولا تأجيل في يوم السداد
والللللله واللي رافع السبع الشداد بلا عمد =لتشوف ما سوت يمينك حق في يوم الحصاد
ويالله تقبل كل ما قلته بكل اللي ورد = وأنا أدري أني شاعرٍ عاجز وأهيم بكل واد
وأزكى الصلاة مع السلام أعداد ما الوبل أنبجد = لمحمد اللي فضله ربه على كل العباد

و هذه القصيدة قيلت إبان الغزو الصهيوني الغاشم على لبنان

والله ما ادري لكن الوقت ما طاع=عيّا يطاوعني وعيّيت لا أطيع
علمٍ لفى للجوف ساطي وبتاع=ينزل على قلبي سواة الفراريع
وفزيت من نومي جزوعٍ ومرتاع=قلت الخبر ؟ ... قالوا خبر تو ما ذيع
يعني الخبر شايع .. أجل كيف ماشاع ؟=ولبنان قطع بالصواريخ تقطيع
وقعدت أفتش بين مرئي ومذياع=وشاهدت شيٍ روع القلب ترويع
شاهدت ورعانٍ مصاخين وأجياع=والعود يبكي والعذارى مفاريع
وأشوف لي ناسٍ على أطراف الأضياع=واليا أنطلق صاروخ ذبوا مع الريع
وأحفر في الشارع عريضات ووساع=والا الثكالا والأرامل مصاليع
وكلنٍ ذرف دمعه على لحظة أوداع=أطفاله اللي يحظنون الرضاضيع
دِكّو بصاروخٍ للأرواح نزّاع=والناس صارت بين صيحة وتشييع
تذرف دموع الحزن والقلب ملتاع=ودموعنا تذرف لكورة وتشجيع
وفي كل وقت وحين تنحاس الأوضاع=وفي كل يوم القصف يزداد توسيع
وأشوف حربٍ طال ما فيه منّاع=راحت أسابيعٍ وباقي أسابيع
والمسلمة ترجي من القوم فزّاع=والناس لاهيةٍ بسهم ومشاريع
ولبنان تنخى كل من للولي باع=اللي تركّع خصمها غصب تركيع
لبنان تشكي هم وأحزان وأوجاع=وحنا بقصعتنا سواة الجرابيع
تحطّمت دور وميادين وقلاع=وعقب المباني صار كومة قراشيع
وين السباع اللي يسمونها سباع ؟=وين السيوف الصارمات القواطيع ؟
دم العروبة تالي الوقت ينباع=والا بوقتٍ فات والله ما بيع
عدوّنا في دارنا صار طمّاع=وحنا ندابك بين قمّة وتطبيع
حنا على ماقيل من جرف في قاااع=واعلومنا صارت خرااط وفقاقيع
وحكّامهم لأمر الأمريكان تنصاع=وانا أشهد انه ماوراهم تسانيع
لا قام واحدهم خطب يبدع أبداع=ويرقّع اللي صار بالقول ترقيع
وكم واحدٍ لابس على وجهه قناع=ويبث سمّه في طرفنا تقاطيع
تجمّعوا ثم أعلن الكل بإجماع=يجمّعون من الخشب والمرابيع
قالوا نعيد بناه بالحال في ساع=ونجمّع اجزاءة بالأموال تجميع
ونرسل بطاطين ومواطير وشراع=ومشرّعين الباب للغرب تشريع
تكفي يابو متعب ترى العرق جزّاع=أفزع وخل الخانعين الخظاظيع
وتكفون ياحكّامنا لا دعا الدّاع=وأظوا نهارٍ فيه نطل القبابيع
اللي عطانا صاع ردوا له الصاع=لا والله الا ردّوا الصاع تربيع
نبغى علومٍ تشبع الخاطر أشباع=ما فادنا كثر الحكي والتواقيع
أبديت شيٍ يجتول بين الأضلاع=والظاهر اني حست كل المواضيع
وكم واحدٍ من حر مايونسه ضاااع=ويالله سترك تالي الوقت لا أضيع
وصلّوا على المختار مع كل مطلاع=أعداد مانسنس نسيم الذعاذيع