[خيَّال الغلباء]

بسم الله الرحمن الرحيم

الـــــســــلام عليـــكم ورحمه الـــله وبركاته ......

هذه قصيدة فــخر واعتزاز في قبائل سبيع الغلباء ...

الشاعر / سعـــد بن سعيد بن نـــوار الملحي السبيعي

يا مدور المعنا ترانا عرفنا=واضح ونوره مثل نور القوايل
إنا هل الردات لا من وقفنا= دقلاتنا تشفي الكبود الغلايل
إليا وقفنا قدمهم ما انصرفنا=حتى نلبسهم لباس الدبايل
نأخذ على قب الأصايل شففنا=بمخيّر صوته سوات المخايل
يا ما سعينا في المغازي وطفنا=غاراتنا فيها تشاف الهوايل
وإليا اعتزا خيالنا وارتجفنا=مثل الرعود اللي تصب الهمايل
وإن صاح صياح المغيره وزفنا=ما نلتفت للجمع لو كان ضايل
يا ما كسرناهم ويا ما عسفنا=من عاصين ما يلتفت للهزايل
وإليا تسوا غيضنا مع صلفنا=نروي السيوف مذهبات الصقايل
حنا هل الغلباء اجموعن وحفنا= خلوا الشجيع يروح قلبه ذهايل
ويا ما على جمع المعادي زحفنا=ولا نرجع إلا بأمهات الشمايل
وحنا هل هل البيرق ويامن طرفنا=ارجال أبولاتركي جيوش دهايل
في شور أخو نورة لبسنا شرفنا=انفضل الموت المحقق فضايل
ذاك الزعيم اللي لنصره نصفنا= وبان الرفيق وبان شين الدلايل
اللي على جيش المعادي نحفنا=لين أسلموا من عقب حد السلايل
إليا رمينا الرمي نكسر هدفنا=وتشهد على ما أقول كل القبايل
في ساعتن فيها تقدم سلفنا=تنشف بها الأرياق والدم سايل
تبعد مغازينا ويبطي نكفنا=تشهد لنا قحص المهار الأصايل
وإليا عطينا عهدنا ما اختلفنا=يومن بعض الناس فيهم فشايل
وجيرانا ما تشتكي من عجفنا=وللضيف نطرح له قعود وحايل
يا ما حذفنا في الدهر وانحذفنا=ويا كم فعلنا في الخوي من جمايل
ويا كم عقيد خافنا لا عرفنا=وقف على جرحه يجر الولايل
وكل الخلايق تروح والعمر يفنا=وتاريخنا يبقى وتبقى الفعايل
حزنا على كل الفعايل ونفنا=ولا نلتفت في هرج عدل ومايل
وفي هرجنا يا سامعه ما زهفنا=واللي مكذبني يشوف الدلايل
شوف مجدنا وأفعال ربعي وشفنا=وتعلمك الأيام عن كل قايل
وبفعل طلقين الوجيه اعترفنا=ما فيه دم إلا يجي له فصايل

أخوي فارس نجد / صح لسان الشاعر / سعد بن سعيد الملحي السبيعي ولا هنت على نقل القصيدة الجزلة .