[خيَّال الغلباء]

بسم الله الرحمن الرحيم

قصيدة الشيخة للشاعر / مقحم النجدي الصقري العنزي

يا الله يا مطلوب يا وال الأقدار= أنت الذي مدات جودك لطيفه
أطلبك يا معبود عاون هل الكار= وتحل شطاتٍ عليهم كليفه
اللي مجالسهم بها بن وبهار= ونجرٍ يصوت للنشامى رجيفه
يا مزنةٍ غرا من الوسم مبدار= اللي جذبنا من بعيدٍ رفيفه
تومر على كل المفالي بالأمطار= وتصبح بها ديران قومي مريفه
ترعى بها قطعاننا سر وجهار= ترعى زماليق الفياض النظيفه
في ضفة الله ثم جبرٍ وجبار= خيالةٍ يوم الملاقا عنيفه
ترعى بها وضحى من الذود معطار =غبوقة الخطار عجلٍ عطيفه
ويبني عليها بنية اللبن بجدار =عقب الضعف راحت ردومٍ منيفه
ما هي حكايا مسردٍ عقب ما نار= اللي هرب وأطراف رمحه نظيفه
والصبر مفتاح الفرج عند الأذكار= ولا صابر تصبح حواله كسيفه
خطو الولد مثل البليهي إلى ثار= زودٍ على حمله نقل حمل اليفه
وخطو الولد يبهش على موتة النار= بين العرب يشبه لخطو الهديفه
وإلى بخصته ما سوى ربع دينار= صفرن على عودٍ تضبه كتيفه
وخطو الولد مثل النداوي إلى طار= صيده سمين ولا يصيد الضعيفه
إلا ومع ذلك لك الله لنا كار= عن جارنا ما قط نخفي الطريفه
ونرفا خماله رفية العش بالغار= ونودع له النفس القوية ضعيفه
ولا نبدي الخافي إلى صار ما صار= يفلج قصير البيت لو بان حيفه
والجار لا بده مقفي عن الجار= وكل بجيرانه يعد الوصيفه
أحدنٍ على جاره بختري ونوّار =وأحدنٍ على جاره صفاةٍ محيفه
نكرم سبال الضيف حق وتعبار= لا من ولد اللاش شح برغيفه
ولا بدها تصبح تواريخ وأذكار= وتبقى لدسمين الشوارب وظيفة

منقول وأنتم سالمون وغانمون والسلام .