اسهيل بان وحان وقت المطاليع
يأهل القنص مقعادكم ويش هو لـه
جوٍّ خلا مافيه كود الجرابيع
والبدو والشوان ماهم بحولـه
وسدرٍ غصونه من ورقها مهانيع
يِلـقا به القمري على اول نزولـه
يجر صوته فوق خضر النعانيع
وتقول معه أهل الهواء مايقولـه
وخوّة صناديد الرجال البواتيع
تسعة ويسوى كل منهم حمولـه
ان خذت معها سبوع وان خذت اسابيع
تـزيد فيها المرجلة والرجولـه
ومبدأ العصير اللي براده ذعاذيع
ترجع به الذكرى لعصر الطفوله
ينسى به التاجر جميع المواضيع
ينسى عقاراته وينسى السيوله
ثروة غناء يامقوّمين المشاريع
ومنوة وكان تجي لنا بالسهوله
واليوم عاقلـنا الدهر عقلة اجديع
واللي نبي صعّب علينا وصوله
وقت الشّقا ماعاد لي به مطاميع
الرجل فيه مقيّده ومعقولـه
والعبد يرضى دبرت الرّب ويطيع
امره ويرضى امره وسنّة رسوله
ياراكب اللي ماشري بالمقاطيع
ولاكل من يبغيه يقدر يطولـه
فكسار طب أهل الكبود المواجيع
وارد زمانه مابعد دار حولـه
ماوقّفه راعيه للسّوم والبيع
موقّفه يبغيه لاضاق جولـه
خلاّه يأخذ من وقوده قراطيع
مع سكةً ماتدرك العين زولـه
يلفي على ستر البنيّ المفاريع
ساس الشهامة والكرم والبطولـه
مضيم منصى مبعدين المراميع
وأن حلْ ذكره عندهم نعّمولـه
يامضيم ليت لماضي الوقت ترجيع
لو إني ادفع كل يومٍ عموله
ماازّين مشاتينا وذيك المرابيع
والعد لامن طوّقو به نزولـه
وشوف العذارى لابسات الدراريع
ذبح الهواوي بالرموش الخجوله
واليوم فكري قام يندل ويضيع
ماعاد تِعْرَف يقضته من ذهولـه
دور حلول امرٍ وقف له على الريع
عساك تلقى واحدٍ من حلولـه
والعلم جاك وسنّع الوضع تسنيع
والعلم لاوصلك ينوِّخ ذلولـه