أنت شوفك يروي القلب وجفافه=وأنت شوفك يسعد النفس الشقيه
ياعيون الظبي لفته وإلتفافه=وسط روضٍ ينعش الروح الهنيه
وسط روضٍ من مشى وسطه وشافه=عاف برج المملكه والفيصليه
بالحياه اللي على النهر وضفافه=تبتدي معها اللحون السامريه
يحتويها الرمش لا حرك لحافه=وتحتويه الناعسات النرجسيه
صورةٍ في القلب لابسةٍ غلافه=ومتقلدته غرام وجاذبيه
يوم يمشي ماتغيّره إنعطافه=كل ركنٍ كنه يلاعب خويه
والجديل ليا تحرك من خلافه=بالمحبه كنه يسلم عليه
وإن رجع وأقبل على صدر الولافه=ومعه عود ومعه هيل وشاذليه
كن بيت المال وقصور الخلافه=كنها قدمي وتضرب لي تحيه
لاتصنّع في الحياه ولا كلافه=مثل قيس ومثل ليلى العامريه
مايغيّره الزمن رغم إختلافه=ولا تغيره الرياح الموسميه
بالمسافه ثابتٍ دون المسافه=لجل بعده ما يصير أكبر قضيه
ساكنن بالقلب في قصر الضيافه=في جناح أهل الغلا والمقدريه