قصيدة للشاعر محمد بن عبدالعزيز بن محمد آل فليج العريني السبيعي
كُتب : [ 23 - 07 - 2007 ]
يالله يا للي له جميـع التصاريـف=يا محصي ساعات سوده و بيضـه
إنك تخلف اللي فعلتـه و لا شيـف=يا والـي الدنيـا عليـك تعويضـه
عطني جزاها يوم فتح المظاريـف=في ساعة و الخوف منها فريضـه
يوم به الظالـم كثيـر التحاسيـف=و لا تفيـده حسرتـه و الغميضـه
زرعت في صبخا ثراها جفاجيـف=و الزرع فيها ما يخضـر بريضـه
يا زارع المعروف عند الحناتيـف=تتعب على زرعه و تجني نقيضـه
المرجله ماهي بهـرج و سواليـف=و لا وجيه في المجالـس عريضـه
المرجله بـذل و صبـر و تكليـف=تزهونها يا هل البخوت الحضيضه
تزهونها يا هل القلـوب المواليـف=و لا تحصلهـا القلـوب المريضـه
يا للي مجالسكم بها الجار و الضيف=لى شافها القـن المهربـد تغيضـه
لا تخذنـه يـا البنـي الغطاريـف=إن كان عنده عجلن في فضيضـه
بعض العرب مثل التنك لون تزييف=و إلا الذهب يغليه طيلة و ميضـه
ترى الجرب يعدي كبار الغضاريف=و الغلث يمرض صاحبه بتعضيضه
الله يبعـد داركـم يـا الملاقـيـف=عن دارنا مسير شتـوه و قيضـه
نسيوا متاعبنـا و ذيـك المواقيـف=لا كثـر الله مسلميـن الحفيـظـه
و صلاة ربي عد مـزن مقانيـف=على النبي ما هل و اقفـى نفيضـه
و اعداد ما ركبوا سروج المواجيف=و اعداد نوار الزهر فـي مفيضـه