من قصائد المناسبات عساها تحوز على شرف رضاكم .
من ضمير الشاعر اللي في لزومه ما توانا= ما يفوت دعوة الغالين قدر الاستطاعه
في حفل مطلق ومطلق عند ابن مجفل دعانا= ابن مجفل شيخنا والعز مرفوعٍ شراعــه
كلنا حضار والترحيب يبداء به حدانا=ويتشرف كل من يحضى بتمـثيل الجماعه
مرحبا ترحيبـةً جزله تليق بمستوانا=شامخـه مثل القمر وصفـه ولونــه وأرتفاعــه
للرفاقه والضيوف ولخويانا وقصرانا=وكل من شرف وشاركنا شعوره وانطباعــه
ليلةٍ غراء وفيها تكتمل غاية منانا=نعـتبر جمع الرجال الطيبين أكبــر طماعــه
بيض الله وجـه من لبا لدعوتنا وجانا= والله انها كلمةٍ من قلب وأخلاص وقناعــه
قدم سمحين الوجيه اللي لهم وزن ومكانا= في منصاة الحفاوة وأمرهــم سمعً وطاعــه
الشحم والبن والهـيل الخضر والزعفرانا= ألحقوها سوقـة الكنبود الاصلي واندلاعــه
وفي مجال الشعر حطوا مايكرفون ومهــرجانا= واعلنوا عنها لــحقين الجرايد والإذاعــه
وأوكلوا . تقديمها لمجربٍ فيه أتزانا= دارسٍ فن الخطابه والمرونـه والبراعــه
يزهم الشعار بالترتيب من صدر البيانا= حسب ترشيــحه وتحليـله وكلٍ من ذراعـــه
من توفق في محاريفــه تصفق لـه يدانا=المعرفه واسعه والشعر بحر بدون قاعــه
والتجارب تظهر المضمون يالله المستعانا= كل ما زادت سنين الاادمي زاد أطلاعــه
المهم نعانق الاذواق لا دارت رحانا= والعلوم الغانمـه لصـحابها مثل الوداعـه
من عوايدنا وورث أجدادنا واسلوم ابانا=المخـوه والمروه والمكارم والشجاعــه
أسمنا الغلباء لمن حاول يوقف في نحانا= حربنا سـموه شيخان القبائل ســم ساعــه
قالها راكان ومحيف على بيض السمانا= وقالها تركي بعد غنــى على رآس الرفاعــه
والمهادي يوم كرمناه بالحســنى جزانا= حيث راع الاوله ما يلحق شبره وباعــه
أسمنا عز الخوي والجار فزعـة من نصانا= نحتسي للضيف مثلوثـه على سـفرةّ متاعــه
بالمفاخر نبتت أزهار أرضنا وامطر سمانا= الجمائل كنها مزروعةٍ فينا زراعــه
من فضل رب العباد اللي من افضالـه عطانا= ما خذيناها بتقليب الحقائق واللكاعــه
الفخر لاهل الفخر ما يجحده لاانتم ولا انّا=كل دارٍ به هله والمجد ما ضاق أتساعه
في الختام أزكى صلاة الله على سيّد ولانا= الرسول الهادي المختار في يوم الشفاعــه