عليكم ورحمة الله وبركاته:
حياك الله يا أخ سيف1 واشكرك على ردك الطيب ورأيك فوق العين والراس بس أحب اوضح عدة نقاط
أنا ما طرحت الموضوع هذا ولا كنت أحب تطرحون مثل هاذي المواضيع اللتي تثير الفتن بين المسلمين والتي حدثت في عصور الجهل فنحن الحمدلله في ديره امن وأمان والحكم لله ولاابن سعود ولا أحد يقدر ينكر هذا.،ولو كانت الغلبه لكم ونحن نعرف لا اعترفنا بذلك ولا هوب بعيب ولا راح بينقص منا أو منكم بشيء فحتى الرسول(ص) هزم في أحد ولا كنت رددت عليكم بذكر قصة هية أخرى غلبناكم فيها وكان صرنا مثل بني هاجر والعجمان وعتيبه وقحطان وعتيبه ومطير واذا كان انتم مقتنعين برأيي وأكيد ما راح تقتنعون(شي طبيعي) فلا أحد يرضى بالهزيمه لقومه لذلك ممكن تطلبون من المشرف مسح الموضوع بكامله والتنافس بقصص الكرم والشجاعه مثل (المهادي والمفرج) تلك القصص التي لا تضرا أحد ويحث عليها ديننا الحنيف.
بخصوص مقالك:
(بخصوص ماذكرت من أن الدائره كانت على الدواسر فهذا ماحدث بالفعل فقد دخل السبعان الى البيوت وغنمو بعض مافيها ثم عاد الدواسر في نهاية الامر ليستردوها وعذر السبعان في ذلك ان الذخيره نفذت منهم )
لا أعرف أي بيوت الله يهداك فالهية صارت في خلا ما عندهم أحد ولم يكن في أراضي الدواسر كما قال الأخ المسلم ولكن في الدهناء .ولم أذكر ان الغييثات كانوا وحيدين.
واما قولك
( عاد الدواسر في نهاية الامر ليستردوها وعذر السبعان في ذلك ان الذخيره نفذت منهم )
يا أخي هذا دليل على انكسار السبعان فنحن ان الغييثات انكسروا في أول النهار وذلك لقلتهم أمام أغلب سبيع وبعدها فزع بعض الشكره وآل عمار والحراجين وبعض العجمان وليس كلهم كما قلت فعدد خيل العجمان لا يتعدى العشرين في هذي الهية بالخصوص ولا أخفي عليك لم يكن النصر بتلك السهوله، وبعدين أنت لم تذكر في كتابتك للقصة للمره اشتراك العجمان ،ولكن قلت بالدواسر وكأنك تقصد بالدواسر الدواسر جميعاً من الخرج للوادي!!!!.
لم اسمع ان الصخابره شاركوا مع الغييثات في هذه الهيه ويمكن تقصد هيه أخرى .
بخصوص مقالك:
( أكرر انه لم يكن بداخله أحد لا العميش ولا غيره ويمكن العميش اسم للناقه إذ أنه ليس من شيم فرسان الدواسر وكل الفرسان قطع خشم إمرئه وقعت في الاسر)
اللي كان داخل المزين هي امرأه اسمها (عمشه) ولاكن ذكرت بتصغير في القصيدة مثل مقالت (سويره) لساره.ولم يكن هناك قطع خشم ولا غيره ولكن المقصود انها رجعت خائبة لأن الخشم رمز العزه والأنفه يقول سبحانه وتعالى في دليل ان الأنف رمز للكرامه
(سنسمه على الخرطوم) أي الأنف والمقصود هنا اذلاله فقد اختار جل وعلى الأنف من بد أعضاء الجسد الأخرى.
(اما أخوال عيال وقيان فهم ال جفران شيوخ العزه )
نعم خاله محمد بن جفران (معشي الذيب) وقائد الغييثات في هذه الهيه محمد بن وقيان اللي انتوا خواله واسمه وارد في قصيدة هجاج.والرجل ان طاب طيبه من خواله على كل حال.
بخصوص مقالك:
(ان يعلم الدواسر ان هناك معركه سوف تقع بين الغيياثات وسبيع ولم يفزعو لبني عمومتهم)
مهي أول مره يحارب الغييثات دون اشتراك الدواسر فهذولا الغييثات كسروا آل مره وعلى ارسهم اميرهم طالب بن شريم يقول سعد بن شفيا في قصيدة منها:
لحقوا على طالب خيل وصبياني=يدعون بالمنع طمعوا في ركايبنا
ومسعود يويق علينا مثل سرحاني=وده بنا مير عدنه مخالبنا
نعم بمسندٍ هو وبن غدفاني=يوم اشهب الملح والبارود حاطبنا
حنا الغييثات منا بذلاني=وفقينٍ رفقينٍ ما تخطي ضرايبنا
وهذا شاعر مطير يقول:
مخيلة ٍ وبلها يركي=ضرب القريزي هل الماها
الخيل عدة من البركي=ضرب الغييثات عداها
عند العرب جادلٍ تبكي=تبغى العضب ولا جاها
وهذا الغاوي من المصره العجمان يتمنى:
ياليت منهو واجه خيل الغييثات=على طويله ساق فجن نحرها
إما تروح الخيل من ضربي أفوات=ولا نروح ولا يجي إلا خبرها؟؟
وغيره الكثير من القصايد والقصص الذي لا يتسع المجال لذكرها.
يقول هجاج آل عيد الغييثات بعد هية العريق،في قصيدة أحفظ منها:
يالله بليلٍ كن تكيشف بارقه=عليه من سل السيوف رموع
جعله على الأطواء يهل مخايله=ومشيميخٍ قبله رثوع
ترعاه وضحا سيرها متمرجع=كنها هنوفٍ من البني فروع
وضحى ندللها ونتبع شفّها=لا من قعد في العش فرخ تبوع
راكب اللي ريفٍ هذيله=توه على حسب الغرض مصروع
نص القعود محمدٍ لا جيته=تبديه بعلومك وهو مفزوع
وكل الجماعة يطلبون علومك=لا فيهم لا خجلٍ ولا دنوع
ان جيتوه ولا جاكم=وخير من يلقا عندكم كرسوع
خلوا المزين ماثنوا من دونه=فوقه العميشه خشمها مقطوع
كل علومي فيكم الهويدي=يستاهل في حربكم كنه حصانٍ ما بعد جاء طوع
خلوا المزين ماثنا من دونه =فوقع العميشه خشمها مقطوع
حنا طولناهم بضرب الهنمي=لين الصعب جاء منهم طوع
حنا خذينا حقنا بايدينا =يوم التقينا في (العريق) جموع
يا نعم والله يا صلايب جدي=يوم الموازر صوتهن يروع
هذا وما أحب تطولون في مثل هاذي السوالف اللي ما تسبب غير اثارة العصبيات ،وعلى العموم يا سيف هاذي فعول ناس لا انا ولا انت نقدر نفعل مثلهم وعسى الله يعفى عنا وعنهم.
وليس الفتى من قال أبي ولكن الفتى من قال هاأنذا.
أرجوا ان تتقبل موضوعي بصدر رحب، وتحية لعموم سبيع الغلبا.
تقبل تحيات أخوك في الله
كعام العايله