برقعك يازين قامت تلاعبه الهبوب
كُتب : [ 22 - 10 - 2008 ]
برقعك يازين قامت تلاعبه الهبوب =وانت تدريبه لكن ماانت حريص عليه
يالميع الاوكسجين وشفق وقت الغيوب= لاارتفع عنه الغطى جعل ربي يبتليه
عزتي للي يشوفه وهوناون يتوب= راح مرواح القطا والشمالي مقتفيه
بري حالي منه بريت محاحيل الغروب= عند شراخ يحوفه ويرك النار فيه
ونتي ونت خلوجن تلد لكل صوب= تخترش وان بان زولن بعيد تلد فيه
احتدوها بالعصا في الترايب والجنوب= لين شال حوارها اللي بماله مشتريه
حرك الموتر وقفا وهي قامت تلوب= والحبال مجوده من فقاره ليديه
كن وزيز ضلوعها جندب الصيف اللعوب= تطلع من الذود يم الطويل وتعتليه
والله اني مثلها بين غالب ومغلوب= مرة عاقل وعشرين مراتن سفيه
انفرا جيبي وانا صابرن صبر مغصوب= طاحله في يد عدون بيلعن والديه
الجفا يا ناعس الطرف مهوب محبوب= لو سألت ادنى بشر قال والله ما نبيه
وانت تسبح للمفاتن تحملنا الذنوب= وأن بغينا ناصل حماك ما نقدر نجيه
|