[بن بجاد]

القدس السليب

يا إلهي وش بقى فينا يشرّف يا إلهي ؟
لا انتصار و لا اعتبـار و لا شمــوخ و لا كـرامـة

اتباعية وذلّ وقِلّ جهد وعذر واهي
وانكسارٍ ما عرفنا وش حلالـه مـن حـرامــه ؟

وين صنّاع القرار ؟ أهل الأوامر و النواهي
وش عذر قادات الأمة والمناصـب والزعـامـة ؟

الحقايق والدلايل في زمان الذل ها هي
واضحة وضـوح شمسٍ مـا تغشتهـا غمـامــه

بعد ما كنّا الأسود اللي بحاضرها تباهي
كيف صرنـا بالحقيقـة مثل سـالفة النعامـة ؟

الخطر يحيط فينا والعقل بالغيّ لاهي
والله إنّـا نستحـقـك يـا العـقــوبة والملامــــة

يومنا نومٍ طويل ما به إلا الحلم راهي
وإن حلمنـا مـا حلمنـا بالفـرح والابتســامـة

وإن بدأ الليل ابتدينا بالملاهي والمقاهي
ضحك و مـزوح وسـوالـف نسأل الله السلامـة

من دعاية ، في مسلسل ، أغنية ، في لبس زاهي
واهتمـامٍ بالمظـاهـر و المراكــب و الإقــامــة

والقنوات الفظيعة تعرض أنواع المشاهي
رقص في رقص وتسابق للسفـور و للوسـامـة

كيف حتى إعلامنا أصبح في طروحاته يضاهي
النصارى و اليهود وقلـب الديـن اهتمامـه

جيت أذكّر كل غافي بالمنـام وكلّ سـاهي
ما يرجّع مجد الأمة غصن زيتون و حمـامـة

شوفوا إسرائيل تفتك بالبلاد أم الدواهي
ما لقت فينا رجـال ولا جيـوش ولا صرامـة

أسرفت فينا وصرنا للمقاصل والمطاهي
وأطلقت شارون فينا والجحش صرنا طعامه

والغريب اللي خذاني فعلاً وشدّ انتباهي
التبلّـد في قضيتنـا الأساسيـة .. علامه ؟؟!!

ماتت النخوة وماتت كل بسمة في شفاهي
يـا عرب وين العروبة والحميّة والشهامـة ؟؟

كل ما شفت القهر والذلّ يمّمت اتّجاهي
يمّة أولى القبلتين وقلت : قـومي يا قيـامـه

يا إلهي جيتك أدعو يا إلهي وأنت جاهي
يرجع القدس السليب وتنجلي عنّا الغمامة

للشاعر /
محمد بن جلبان السبيعي