[خيَّال الغلباء]

بسم الله الرحمن الرحيم

أيامنا والليالي كم نعاتبها= شبنا وشابت وعفنا بعض الأحوالي
تاعد مواعيد والجاهل مكذبها= واللي عرف حدها من همها سالي
إن أقبلت يوم ما تصفى مشاربها= تقفي وتقبل وما دامت على حالي
في كل يوم تورينا عجايبها= واليوم الأول تراه أحسن من التالي
أيام في غلبها وأيام نغلبها = وأيام فيها سوا والدهر ميالي
جربت الأيام مثلي من يجربها = تجريب عاقل وذاق المر والحالي
نضحك مع الناس والدنيا نلاعبها = نمشي مع الفي طوع حيث ما مالى
كم من علومٍ وكم آداب نكسبها =والشعر مازون مثقالٍ بمثقالى
أعرف حروف الهجاء بالرمز وأكتبها= عاقل ومجنون حاوى كل الأشكالى
لكن حظي ردي والروح متعبها = ما فادني حسن تأديبي مع أمثالي
إن جيت أبي حاجةٍ عزت مطالبها =العفو ما واحدٍ في الناس ياوالى
قومٍ إلى جيتهم رفت شواربها = بالضحك واقلوبها فيها الردا كالى
وقومٍ إلى جيتها صكت حواجبها =وأبدت لي البغض في مقفاي وإقبالي
ما كني إلا مسوي حال مغضبها = والكل في عشرته ماكر ودجالي
يا حيف تخفي أموراً كنت حاسبها =واللي على بالهم كله على بالي
الجار جافي وكم قومٍ محاربها =والأهل وأصحابنا والدون والعالي
والروح ويش عذرها في ترك واجبها= راح الحسب والنسب في جمع الأموالي
نفسي تبى العز والحاجات تغصبها = ترمي بها بين أجاويد وأنذالي
المال يحيي رجالاً لا حياة ابها= كالسيل يحي الهشيم الدمدم البالي
عفت المنازل وروحي يوم أجنبها= منها غنيمه وعنها البعد أولى لي
لا خير في ديرةٍ يشقى العزيز ابها= يمشي مع الناس في همٍ وإذلالي
دارٍ بها الخوف دومٍ ما يغايبها= والجوع فيها ومعها بعض الأحوالي
جوعى سراحينها شبعى ثعالبها= الكلب والهر يقدم كل ريبالي
عز الفتى راس ماله من مكاسبها =يا مرتضي الهون لا عزٍّ ولا مالي
ذللت بالروح لين أرخصت جانبها= وأنا عتيبي عريب الجد والخالي
قومٍ تدوس الأفاعي مع عقاربها= ولها عزايم تهد الشامخ العالي
خل المنازل وقل للبين يندبها =يبكي عليها بدمع العين هطالي
لا تعمر الدار والقالات تخربها= بيع الردي بالخساره واشتر الغالي
ما ضاقت الأرض وانسدت مذاهبها = فيها السعه والمراجل والتفهلالِ
دارٍ بدار وجيرانٍ نقاربها = وأرضٍ بأرض وأطلالٍ بأطلالي
والناس أجانيب لين إنك تصاحبها= تكون منهم كما قالوا بالأمثالي
الأرض لله نمشي في مناكبها = والله قدر لنا أرزاق وآجالي
حث المطايا وشرِّقها وغرِّبها = واقطع بها كل فجٍّ دارسٍ خالي
واطعن انحور الفيافي في ترايبها= وأبعد عن الهم تمسي خالي البالي
من كل عمليةٍ تقطع براكبها = فدافد البيد درهامٍ وزرفالي
تبعدك عن دار قومٍ ودار تقربها= واختر لنفسك للمنزال منزالي
لو متّ في ديرةٍ قفراً جوانبها =فيها لوطي السباع الغبس مدهالي
أخير من ديرةٍ يجفاك صاحبها = كم ذا الجفا والتجافي والتعلالي
دوس المخاطر ولا تخشى عواقبها =الموت واحد وبعد العز يجلالي
إن المنايا إذا مدت مخالبها= تدركك لو كنت في جو السماء العالي
ما قرت الأسد في عالي مراقبها =تسعى على الرزق ما حنت للأشبالي
والشمس في برجها والغيم يحجبها= تقفي وتقبل لها في العرش مجدالى
رب السماوات يا محصي كواكبها= يا مجري السفن في لجات الأهوالي
ضاقت بنا الأرض واشتبت شبايبها= والغيث محبوس يا معبود يا والي
يا الله من مزنةٍ هبت هبايبها =رعادها بات له في البحر زلزالي
ريح العوالي من المنشى تجاذبها =جذب الدلى من جباء مطوية الجالي
ديمومةٍ سبلت وأرخت ذوايبها = وإنهل منها غزير الوبل همالي
تسقي دياراً شديد الوقت حاربها =ما عاد فيها لبعض الناس منزالي
يا جاهل اسمع تماثيلاً مرتبها =فيها معاني جميع القيل والقالي
مثل المحابيب زادت في قوالبها= في صرفها زايده عن قرش واريالي
يا ربي توبه وروحي لا تعذبها= يوم القيامه إذا ما ضاقت أعمالي
وأزكى صلاةٍ على المختار نوهبها= شفيعنا يوم حشرٍ فيه الأهوالي