تنقضت منها الجروح المعاطيب***ياثورة الاحزان.. بالله هدي

[راعي مرات]

مؤمن بربي دون شكٍ ولا ريب
راضي بحكمه خاضعٍ مستعدي

وإلاّ لواني أعلم السر والغيب
ماكان دمعي جرح اليوم خدي

ولو كان رمعاتي على كيفي تصيب
ماوقّفت دنياي ..والحظ ضدي

شهب الهقاوي مثل سرّب اليعاسيب
فوجٍ يعشينا ..وفوجٍ يغدي

تقّنب لنا بقعا كما يقنب الذيب
لو اقبلت يومٍ ..فعامٍ تصدي

نصبر على ضيم الدهر واللواهيب
همٍ تلاطم بين جزرٍ ومدي

نوبٍ تكدر صافيات المشاريب
واحيان ما ندري وش اللي نبدي

تنقضت منها الجروح المعاطيب
ياثورة الأحزان .. بالله هدي

اكنّ اسراري بوسط المحاديب
واموت ما بيحت للناس سدي

ماشاقني حب البني الرعابيب
ما لي بها شفٍ.. ولاهيب ودي

اخاف يشناني قريّب محاضيب
وعين الشماته ماتلد وتصدي

كم واحدٍ تحسن به الظن ويخيب
وكم واحدٍ يشفيك لا جاء التحدي

فلا تتبع المقفي.. ولا تقرب العيب
وإن روحوا عَنك فمرواح جدي

واحذر من اللي ينقل الهرج ويجيب
يجيب لك علمٍ ..والآخر يودي

واللي يتردى ما يعرف المواجيب
ماهوب ندٍ لك ولاهوب قدي

وإن وصلت لضرب القنا والمشاعيب
كلٍ على حوضه لزومٍ يضدي

نبني علاقتنا على العز والطيب
واموت ماصعرت للناس خدي

وماذكر حيٍ خالي من العذاريب
ومافيه شخصٍ طول عمره مقدي

رتبت قولي للفطينين ترتيب
اللي تفرق بين هزلي وجدي

العمر راح.. ولاح في عارضي الشيب
وإن ماكسبت الطيب ماعاد يمدي

وصلاة ربي عد زهر النبانيب
على النبي واعداد نجمٍ معدي

راعي مرات
عبدالرحمن عبدالله المجلي
1/1/1444

https://youtu.be/OlrJgo9hcOI