احيه شي بضامري قب واشتب(جديدة)

[عبدالله النعيمي]

احيه شي بضامري قب واشتب =يضرم سعيرٍ شبها في ضلوعي
غدا كما جمرن عليه الهوا هب= والجاش كنه واريات الجذوعي
اعوي كما سرحان يعوي ويقنب=يدوي قنيبه في السهل والتلوعي
واذوي كما عودن عليه الدبا دب=واصفرَ واهشم عقب ما هو ينوعي
والحيل واني ومسقم الجسم متعب= والعين تهمل ذارفات الدموعي
تهمل صفي الدمع لين انه انضب=ويوم انتضب صافيه هلت مزوعي
دمن على خدي نثير يتصبب=ونومي طوال الليل من فوق كوعي
والين شق النور وانا اترقب=واذكر زمان راح مني هزوعي
وساورني الهاجوس في كل مقلب=وفي مرقدي سهران تلفن جزوعي
تلفن من العبرات ما انفك تسكب=وقلبي غدا يا ناس في غير طوعي
قلبي غدا في ساقة اللي تذهَب=واوغل بهجره ما افتكر بالرجوعي
خذاه وخذ القوم يومه تسبب=يومه رمق بالحاظ سودن وسوعي
يومه رمق بالحاظ للقلب تسلب=وخدوده اضوت مثل برقن لموعي
سود الجدايل فوق بيض المناكب=خلت فوادي مشتحن له رقوعي
وخشمن كما الهندي عطيب المضارب=وشفاه ُحمرٍ قانياتن رذوعي
وقدن روي والجسم عدلن ومنصب=كما عود موز براويات الزروعي
وكفوف بالحنا تنقَش وتخضب=نقشن عليها كل شكلن ونوعي
خذا فواد المشتقي ما تحسب=واقفى وشد لنايهات النجوعي
وانا عليل الجسم والحال ينصب=وعن البرا منصاع نازح نزوعي
وارود انا الاقذال في كل مرقب=وفي كل رجمن نابين في رفوعي
اجر عال الصوت من يوم تغرب=والين يشق النور وقت الطلوعي

نظم اخوكم\ عبدالله بن ابراهيم ال مهنا النعيمي

ارجوا ان تنال اعجابكم وهذي اول مشاركاتي معكم وحبيت اشارك بها حيث انها اخر ما كتبت من القصايد .

[منصور الحري]

صح لسانك مصافحة أكثر من رائعة


لا تحرمنا جديدك

[عبيد ابو شيبه]

عبد الله النعيمي

اطلاله جميله مشرقه يغلب عليها الحس الوجداني

لاتخلو من الجزاله صح السانك وسلم بوحك

ننتظر جديدك

[عجمي رخم]

صح السانك علي هالدرر الجميله اتمتع الواحد وهو يقراها

[راعي مرات]

ألأخ عبدالله



صح لسانك



جميلة


ولكن


احيه شي بضامري قب واشتب
يضرم سعيرٍ شبها في ضلوعي


أحيه تطلق عند الشعور بالبرد

وهنا تم توضيفها للدلالة على الحرارة


أشعر بوجود تنافض

لا أدري


وجهة نظر

آمل تقبلها

[عبدالله النعيمي]

يا هلا بك مليون يا راعي مرات وبالعكس انا اتقبل اي ملاحظة بصدر رحب لا نها تصب في مصلحتي ومصلحة القراء الاعزاء



بالنسبه لا حيه فانها تجوز للشعور بالحرارة او البرودة مثل ما تفضلت


ودعما لرايي ساورد مطلع قصيدة لجدي الشاعر محمد بن راشد المهنا النعيمي (ابو بدر) رحمة الله عليه


يقول في مطلعها


احيه شب بضامري لاهبن حار = بين الضلوع وساعره بالسراجيف



وهي قصيدة توجد طويلة وعمرها اكثر من ستين سنه



الشاهد ان احيه يمكن ان تكون لكلا الامرين الشعور بالحرارة الشديدة وكذالك الشعور بالبرودة الشديدة


واسف على الاطالة طال عمرك ,,

[راعي مرات]

عبدالله

تسلم


كفيت ووفيت


إيضاح وافي


لاهنت على سعة خاطرك



دام عزك

[فـــالح السبيعي]

عبدالله النعيمي

صح لسااانك قصيده طيبه وبها معاني جميله

شاعر متمكن في الشعر

وخالص الشكر لك ولراعي مرات

على هذا النقاش الرااائع