[الحريق]

بسم الله الرحمن الرحيم
السلام عليكم ورحمه الله وبركاته
اليوم نزلت لكم موضوع محاوره للشاعرين الكبيرين الجميلين واستمتعت الحقيقه بحضورها وكان الحضور كثر وجميل

وبأسمي وبأسم الشاعر راكان بن بدن والشاعر نايف بن شعمل شكر منتديات وشبكه مجالس السهول

التي استضافتنا ونشكر جميع من ساهم في هاذا المجلس

وكانت المحاوره للشاعر راكان بن بدن والشاعر نايف بن شعمل
وكانت بدايه المحاوره مع الشاعر راكان بن بدن

راكان بن بدن يقول

سلام يا اهل المجالس كلبوكم عموم
تسليمةٍ للنشاما ينتشي ندّها
تنصا سهول الحميّا كاعمين الخصوم
شهادةٍ كل طيّب لازم يعدّها

نايف بن شعمل يقول
أقلط مابين المبادي والكرم والسلـوم
وشذرة سيوف المعاني يالشلي حدهـا
مابه جديد الفخر معنا ومعكـم طهـوم
ياسبيع ياهل السطر والجود واهل الدها

راكان بن بدن يقول
قبل امس في صالة الرحلات قسم القدوم
فالزحمه اتقصّر الخطوات واتمدّها
بين انفلنزا الطيور وبين حرق الشحوم
راحت ملايين خلق الله في يدّها

نايف بن شعمل يقول
قبل امس في ديرةٍ متلبده بالغيـوم
والا انت عشّ الهبايب عندك وغدها
لاتحسبن كل رمعاتك تسـد اللـزوم
لك غايةٍ بس كانك طعتنـي عدهـا

راكان بن بدن يقول

يانايف ابن شعمل ياجعل حظك يقوم
لو أن بعض العرب مابيّحت سدّها
مابين برد الهبوب وبين حرّ السموم
الكلمه اللي تضيّق خاطرك بدّها

نايف بن شعمل يقول
الحـظ طيـب ولله الشكـر كـل يـوم
كثّر من ادعاك لين احقوقـك تّردهـا
في كون ربي خلق معطى وخلق محروم
عينه على من عطاه الله يبـي لدهـا

راكان بن بدن يقول
شفت القمر والجدي وسهيل بين النجوم
لو طال عمر البنادم ماوصل حدّها
مير العرب عن كثير البلبله ما تصوم
بيض النوايا تساويها بمسوّدها

نايف بن شعمل يقول
ماتجتمع كلها مثل العمر مايـدوم
لكن بعض العرب وصلو وهم قدها
شي ٍ طبيعي تردد فالحياه العلـوم
لأنته ولاغيرك من الخلق بيسدها

راكان بن بدن يقول
مانشره ألا على اهل الطيب شروى القروم
مثلك لكنّ المهبّل ينلعن جدّها
والله لأحط الوشم في خد زاهي الرقوم
أما زها خدّها وألا لطم خدّها

نايف بن شعمل يقول

تبغى تغوص البحر لاكن منتب تعوم
هقوات بعض الملا يمكن تجي ضدها
ماسرت الغطرسه فرعون لوّه عزوم
أقرب لها لطمت الخد الشقي هدهـا

راكان بن بدن يقول
من قبل زرق السهوم وقبل فرك الخشوم
يكفي اتضح مزح خلق الله من جدّها
خابرك تبغى ولكن منت رجلٍ قدوم
تهاب زرق البحور وجزرها ومدّها

نايف بن شعمل يقول
يابن بدن لاتغرّك فالحيـاه الحلـوم
الواقيعـه تـوّد النفـس وتوّدهـا
نبغى ولكن بدون قصور عنكم نشوم
والا الظمايا نوردهـا علـى عدهـا

راكان بن بدن يقول
رجِلك تهقوا تعلاّ عاليات الرجوم
تكدّها مير ماتلقى جزا كدّها
وتلدّ عينك على اللي فالخضيرا يحوم
وتمنّي النفس لا كلّت بـ( لابدّها )

نايف بن شعمل يقول (( الختاميه عند الشاعر نايف ))
لا يالبيد الشعر وش جبت يومـك تـزوم
أشغلت خلـق الله وّغيـرك طلـع ندهـا
حومك على الارض بين العرفجه والحزوم
أبعـد مناويـك مافكـت يـدك شـدهـا


آخيرا وليس آخر كلمه للشاعر( نايف بن شعمل )
’’بيض الله وجيه المتواجدين
هاذي المحاوره جميله بالتأكيد
ألتي جمعتنا في هذا المساء
الأكثر من جميل
نشكر شبكة مجالس قبيلة على كل مابذلوه

أبومحمد تشرفت باللعب مع شاعر مبدع ومتألق مثلك لاهنت
أستفدت من الكثير هذا المساء ’’

كلمه للشاعر ( راكان بن بدن )
’’صح لسانك
وبيض الله وجهك يابوعبدالله
استفدنا منك يالقرم

والله يبيّض وجيهكم جميع على حضوركم ومتابعتكم
والصراحة استمتعنا في مجالس السهول المنتدى الشامخ والرائع
بإدارته ومشرفيه واعضاءه’’

ملاحضه : من جهدي اناااااا