بسم الله الرحمن الرحيم
باح العزى قصيدة غزليه للشاعر حمد المغلوث
باح العزا من الحبيب الجنوبي كن العقل يا علي بالكف مجذوب
ياعلي تذكار أريش العين دوبي زوله يزول لي وأنا عنه محجوب
أبكي على فرقاه والعي وأهوبي والدمع من عيني على الخد مسكوب
من حر نار الولف مزعت ثوبي وطوحت بالونه على كل نبنوب
وعقب الستر كل الخلايق دروا بي والسد ثار من الحشا ثورة الطوب
ياعلي لي نسنس نسيم الهبوبي نودٍ من الشرقي برى حالي النوب
سلال سل الحال من كثر لوبي لاهم لافرقا ولانيب مطبوب
ألا بلاي فراق من سد نوبي عن كل معشوق ٍ من البيض رعبوب
ياعلي يافرز الوغا يا محبوبي ويش أنت شايف يا حجا كل منكوب
عيا يطيب لي الكرى مع شروبي وكن الحشا يصلى على حر لاهوب
ليت الركايب ياعلي ما مشوا بي من ديرة المحبوب والرزق مكتوب
وياليت ربي ماسعى في ركوبي ليت السنع معتاق والدرب مقضوب
واليوم ياغافر عظيم الذنوبي أسالك يامطلوب ياخير مطلوب
تجمع بشملي مع حبيبٍ عجوبي محبوب ماغيره من الناس محبوب
اللي كما بدرٍ قرب للغيوبي أو شمعدانٍ في دجى الليل مشبوب
أصفر عفر والكف منه مخضوبي ومجّمله ربي ولا فيه عذروب
الا الوفا ماهو مكورٍ كذوبي ومغفلٍ مايعطي العلم مقلوب
أنا اشهد انه ثقل الحمل صوبي بالحب وادعاني شقيٍ ومتعوب
هو ريف روحي ياعلي لو حكوا بي مصدود عن عذل العواذل ومحجوب
ما أطيع أنا العذال لو فرقوا بي ولا أكف عن وصله ولا أسلى ولا أتوب
ما أسمع ولو حي عن حبيبي ولو بي صبر فلا حاربت زادٍ ومشروب
ما أطيق أنا الفرقا رقاقٍ جنوبي وقلبي رهيف ودايم الدوم متعوب
يوم الليالي عن حبيبي رموا بي غديت مكتوف الجناحين ومصيوب
مثل الوحيد اللي غريبٍ اعزوبي مستاجع ماله حدٍ يقضي النوب
أو شبه حيدٍ للسرات مغصوبي حمله ثقيل وضارب الخف شاذوب
وألا كما طفلٍ يتيم يحوبي من قلة الوالي ورى الباب مذبوب
هذي سواتي عقب فرقا الجنوبي اللي هجرني ما لفى منه مكتوب
هو يحسب إن البيض عقبه غدوا بي أنا بصوب وعن هوى البيض في صوب
وين أسلي اللي لا ذكرته يذوبي عقلي وهو متغطرسٍ يسحب الثوب
غروٍ من البيض العذارى محسوبي ترف الحشا ومعزلٍ تقل يعسوب
كن الردايف لي أقتفاها الهبوبي صيوان حكام بالأطناب مضروب
وعيونه الخرسات سودٍ سطوا بي ونهود مثل التين والعنق مسلوب
ياعلي وين أسلى الهوى وين أتوبي وين أقدر التجليد والعقل منهوب
ياعلي خلوني حزين وألوبي لوب الحمام اللي على راس نبنوب
غير الوصل ماشي يطفي لهوبي وصلوا على المختار ما أفتر دالوب
وانتم سالمين والسلام