سلام عليكم
كيف الحال ياجماعة
عندي موضوع خفيف اتمنى ان ينال على رضاكم
********************
يكثر في فياض الصمان الابل لكبر المساحه وحسن المرعى وكثرة الربيع وقت
الامطار( الله يجيب السيل) وايضاً وجود الدحول التي تختزن الماء في
الصيف(الدحول : جمع دحل وهي الحفر العميقة الملتوية في الأرض وتكون في
اماكن منخفضة من الأرض تنحدر السيول فيها اثناء موسم الامطار)من هذه
الابل حاشي مراهق ممشوق القوام ابيض اللون كثيف الشعر على الرقبة
والحلق والرأس وذروة السنام يمشي متبختراً بجماله( ولا رامي عيّاش في غبة زمانة)
همه يتندح بين هالنياق الصغار خاصة(البكار) ويضمنها لا هيئة ولا شرطة
المهم00 مرّت الايام وهو على هالحال همه أكل وشرب وغزل في هالنياق
يوم جا ذاك اليوم على عادته الا هاك الناقه واردة الماء وتبي تشرب
وما أقدرت تشرب قال هذي فرصتك وقم وافتح لها حنفية الوايت كلها. قال: اشربي العن
ابو الفقرلا تروحين للدحل وانا موجود على غير اهلها ماتجيب راس مالها0
شربت لين رويت ومسحت شفايفها بمنديل عشان مايخرب الروج وقالت الله
يعطيك الف عافيه توني زملة من نزلت ها الدحل وعلي هالخف الكعب يزلّّق!!
قال الحاشي :
على شانك تحملت الصعايب ** اذوق المر لأجل رضاك حالي0
ابتسمت الناقه وصكّته بذيك النظره اللي بغت تجيب اجله0
تنهّد وقال:
الله اكبر كيف يجرحن العيون ** كيف مايبرى صويب العين ابد
احسب أن الرمش لا سلهم حنون ** واثر رمش العين ماياوي لاحد
يوم روّح لي نظر عينه بهون ** فزّله قلبي وصفّق وارتعد0
ضحكت الناقه ودرت انها لعبت في سستمه00حطته وراها ومشت على هونها وهي
تومي بذيلها00 يمنة ويسره00 وقلبه يروح يمين ويسار 0
قال آآآآآآه
وانعطف هاك الشعر فوق المتون ** وانثنى عوده وقفى وابتعد0
طال الليل على خوينا الحاشي متى يجي الصبح؟ 00كل شوي يطالع في
ساعته (الريموندويل) ماصدق اانه يسمع صوت الراعي يذّن 00طمر من محلّه
وراح يدور عند الشبك وهو يطقق خفوفه 00 طبعاً ماله أصابع00 وهو يقول
الحب قطع قلوب البعارين**حتى الحمير السود يلعن جدفها
ويروح ويجي لين طلع النور وجاالراعي وفتح لهم 00 هو يقاله صغير والا
الأبل مايصّك عليها00 ماصدق خبر وراح عند الوايت يحتريها تشرب 00 جا
الراعي
قال : خير انشاالله وش جايبك انت وخشّتك كل ذا ضما يعني؟؟
تلعثم الحاشي00 قال : هاه لااا أبد مافيه شي بس طاح كبكي امس هنا وجيت
ادوره0
قال الراعي:اقول بلا استهبال كبك وانت عليك ثوب ساده!! يالله ظف وجهك مع
البعارين لا ألكمك.
لٌقّط وجهه خوينا وراح0
قال: خيــره انها ماسمعت وش قال لي الراعي كان طحت من عينها ولا عطتني
وجه00المهم وهو يكلم نفسه الا هذي رفيقته تقابله.. يوم شهق من الفرح
(أمّا بعير يشهق كثّر منها)
وقال :
كفاني عذاب الله يجازيك بافعالك ** جرحت الضمير ولا طرالك تداويني
ضحكت الناقه ذيك الضحكة اللي أشلعت قلبه وقالت:
ياعل قلب ماشكا الحب والتاع ** تنهار من فوقه محاني ضلوعه
ياما نهيت القلب لا شك ماطاع ** ماطاع يدله والليالي تلوعه
أثر الموّلع دمعته تجرح القاع ** والى ذكر مافات هلت دموعه
الحين تاكد الحاشي انها تبادله نفس الشعور00 ارتاح خاطره واسفهل ّوجهه
وماعاد خذته الدنيا00 مرّت الايام وكبروا وكبر حبهم معهم ،يلتقون كل
يوم ويتبادلون المشاعر والاحاسيس 00 وفي يوم من الايام وهم قاعدين على
ذاك الطعس الا يوم مرت ذيك الناقه العفراء00 طيّّر عيونه رفيقنا مشبّّه
عليها00مهوب قصده شي! انتبهت له الناقه خويته وطمرت من محلها قالت خلها
تنفعك الله يمّليك بركتها00 انتبه خوينا انه اخطأ ولحقها
وقال: وّقفي اشرح لك الموضوع ..التفتت عليه وقالت:
مدام قلبي لك شفوق وميلاف ** وراك ياخلي قليل المروفه
قلّي عسى مابه على الخاطر خلاف ** عسى حبيبي ماقصر دون شوفه
لا لا تعسر القلب في كل محراف ** واحذر يجي عقب الموده حسوفه
دوك الدموع بحاجرالعين وقّاف ** لاانت بماسكها ولاهي ذروفه
تحسّف ابو الشباب ودرى انه غلطان وانه حسّها.. رد عليها وقال :
لك حق تزعل ثم لك حق نرضيك ** مااقوى زعل حبيب قلبي وعيني
مدام قلبي ياريش العين مغليك ** اطلب ولك روحي ومافي يديني
يوم الله احسن صورتك خصّني فيك ** فيك الجمال وصادق الحب فيني
وقفت وتبسمت .. وارتاح خاطرها.. وهو تنهد و قال هاه طاح الحطب ؟ قالت اه
ياااني لو كنت أأدر اسيبك (شويكار مهيب ناقه) وعاشوا في سبات ونبات وخلفوا حواشي ونوقات0
وسلآمتكم،،