[محسن بن طامي]

قالوا أن الطيب موجود والدنيا بخير =قلت في ذا الوقت بانت معالم لندثار

كل ما أمل بشخص كبير جاء صغير = وأصبح أكثر من تكابرت في عيني صغار

والله لا نيب متكبر ولا ميت ضمير = أتكلم من تجارب بدقه وأختصار

يعلم الله ما حقر ناظري غير الحقير = بعد ما أعمل له تجارب وكرر لختبار

واتجاهل هفوة الطيب ويبقا كبير = واحد لاغلط بالطيب رد الأعتبار

وأنقد اللي لا غلط ينفرد مثل البعير= وأنكر اللي يعمله وانتفخ رأسه وبار

من تمادى فالخطأ يعتبر نفاخ كير = ألا شخص لا أدعى وانتقم طلاب ثار

ومن يغره ماله ومنصبه مافيه خير = قد يذكره الزمان العبوس اليا استدار

ومن يمد اليد إلى راع الباع القصير = مثل من يفهق يمينه ويأكل باليسار

لو تجوع وتفترش لأرض ولحافك هجير = خير لك من مدة اليد وتعطا باحتقار

قبل تنوي وردة العد طالع بالصدير =لأجل تقدر قبل تاصله تغيير المسار

ومجلس ما تحترم فيه لو راعيه أمير =جنبه للمجلس اللي تحصل به وقار

فالوفاء لايملكه لاغني ولا فقير = مهنة أهل الطيب واللي مواهبهم كبار

رفقة رجال الوفاء مثل نفحات العبير = ومسند عند الشدايد لا من الوقت جار

والردي لو تجمعك به صله وألا مصير= أن بغيته ما لقيته وأن احتاجك قيار

فالغبي اللي يقع فالخطا بعد النذير = والذكي بالطيب من يملك رقاب الحرار

وخف من اللي تستشيره ولا يصلح شوير = وتترك الحكمة معا واحد مايستشار