[أبو عايض]

من لا يجيني مجيّه ما آتهقوابه=عيب أني أزاور اللي ما يزاورني
ومن لا حسبني تراني ما أحسب حسابه=ما والله أقدر اللي ما يقدرني
واللاش من عادتي ما آقف على بابه=ما احداً على رفقة الأنذال جابرني
أنصا الكفو والردي لي عنه جنّابه=تجارب الوقت من الأنذال تنذرني
نفسي عزيزة واعرف الطيب وابوابه=وأختار الأصحاب وأفكاري تخيرني
واللي يخالف مزاجي ما آتقدابه=طبيعتي والليالي ما تغيرني
أهل الوفا للوفاء والطيب كسابه=وألا الحشف طول عمره ما يجي برني
ذا الوقت فيه الردى والطيب متشابه=يا والي الكون من جور الزمن جرني
أشوف بعض الثعالب صارت ذيابه=وتنافس الذيب لو ملبوسها درني
والذيب حول وخلى راس مرقابه=شم الذبيلة يقول الوقت غادرني
مشاكلاً جالها في القلب بوابه=بعض الليالي تزعلني وتسهرني
وأسبابها ناس خداعة وكذابه=يا فكري اليوم وردني وصدرني
بعض الأوادم غدا في داخل الغابه=وإلى تنشدت ما أحداً عنه يخبرني
اسم بلا جسم مدري عنه وش صابه=من صد عني فراقه ما يخسرني
لو راح بأقصى الجزيرة ما درينا به=لا مستشيره ولا أريده يشاورني
يا واسع العرف لا تبلش وتشقا به= عقّب رفيقاً بتالي الوقت ينكرني
لعلها ساعةً للخير جلابه=لا صرت أنا خاسره واللاش خاسرني
وأنا صديق الصديق ومصدر إعجابه=واللي على غايتي يعرف وخابرني
لا من بداله لزوم ما بخلنا به=وإليا تعذرت عذري ما يعذرني

الشاعر / عايض بن فرزان السبيعي