[خيَّال الغلباء]

المشاركة الأصلية كتبت بواسطة مبارك مقين

لا أقبل سواد الليل جاب الهواجيس = تحرك براسي عن النوم هوجاس
تسهر عيوني كن فيها دبابيس = والقلب يقرع بين منحي الأقواس
يقرع قريع الشن وعروقه يبيس = يدن صندوقه مثل دن الأجراس
تاخذبه هجوس الليالي مراويس = لا ذعذع الغربي بذعذاع نسناس
جدد جروح مبطيات (ن) مراميس = اللي زرعهن في خفا صدري الياس
عليك يا راع العيون النواعيس = سود (ن) هدبها كن في طرفه انعاس
والعنق عنق اللي ربت فالطعاميس = تذيرت سمعت لها أصوات وأوناس
تجفل ليا هبت هبوب النسانيس = ما ترتع إلا في عثامير الأطعاس
ضامر حشا والجسم يشكي الملابيس = حبه بنا في القلب بنين على ساس
يا سوق قلبي سوق هجن (ن) حراسيس = عقب الشحم مثل العياسيب يباس
عليهن اللي يكسبون النواميس = ما خافوا إلا من رجوع (ن) بالإفلاس

أخي الكريم الفاضل الشاعر القدير / مبارك بن مقين السلام عليكم ورحمة الله وبركاته وبعد : صح لسانك وسلم نبضك وبنانك وإعتلا شأنك على هذه القصيدة الغزلية الرائعة والمعبرة والجميلة ولك لغة شعرية عذبة لا تشبه أحدا إلا أن عليها بصمة خاصة للشاعر القدير / مبارك مقين والله يعافيك ويبارك فيك ويجزاك خيرا ويبيض وجهك يوم تبيض وجوه وتسود وجوه هذا وتقبل فائق الشكر والإمتنان مقرونا بجزيل المحبة والإحترام والله يحفظكم ويرعاكم مع خالص التحية وأطيب الأمنيات واسلم وسلم والسلام .