[خيَّال الغلباء]

كل دار أرجعت وأنا سناوي
= عزتي للي سواتي عزتي له

زادت الحمى فرحنا للمداوي
= والمداوي زود الحمى مليله

يا جميله كن يطوي الحال طاوي
= والله إن كبدي على شوفك عليله

والله إن قلبي على شوفك شفاوي
= غير لا بيدي ولا بيديك حيله

سجليني في بحر حبك فداوي
= أنا مجنونك بعد مجنون ليله

يا رقبة الخشف يا عين النداوي
= يا سراجيف الذلول المستحيله

يا مناة تنقصر عنها المناوي
= يا خيار الدهم يا القبا الأصيله

لعن أبوك أنتي مكاسر عود جاوي
= ملبسك سندس شرابك سلسبيله

لو تمرين الشيوخ أهل الفتاوي
= عودوا مثلي يجرون الطويله

من هوى شرواك وإلا لا يهاوي
= التقيد عن بعض الأشياء فضيله