جدتي وامام المسجد والتلفزيون
اشترينا تلفزيون ابيض واسود الله يبيض وجيهكم
وشغلناه بعد ما اجتمع شيب وشباب الحاره
على ترجمة ما في كتلوجه بمفهوم الاشاره والا اللغه ما عندك احد
وجاي باللغه اليابانية ودورها المهم بعد عدة محاولات شغلنا التلفزيون
جانا الاريال نركبه حسب الكتلوج وبالرسم الين استطعناالوصول الى تركيبه
والحر بالاشارة يفهم
ساعه طالع وساعه نازل اوجه الاريل
المهم تعبت ربطت الاريل بحبل صرت اوجهه من الارض الين اشتغل
زين قمت ثبته عى وضعه اول ما طلع فيه سميره توفيق
وعندنا رجال مسوين عشا عشان جدتي ضيفه عندنا
كان من ضمن الحضور امام المسجد جالس سميره توفيق تغمز بعينها
وهو يطل قام وجلس بمكان ثاني الشاشه بلوريه
يعني من اي اتجاه كأن الي بالتلفزيون يعنيك بالنظر
الرجال قام كم مره غير محله ما فيه فايده المهم
وهو يسر للي بجنبه قاله انت تشوف الي انا اشوفه
قاله عساك بس انت ما تشوف الي انا اشوفه
والله انها اتقصدني وبعيونها تشغلني
بعد شوي ابوي قال صكو هالبليه عنا خلونا نسمع حكي الرجال
اطفال وفرحانين ما قبلنا نبغى نشوف التلفزيون
والبيت كله غرفتين غرفه للرجال وغرفه داخل ومليانه حريم
عز يازينه الضيق بالمكان ما هو بالقلوب
المهم وياخذ الامام مفاتيحه ودب
والحمد لله ماصابت التلفزيون وش وراك يارجال
قال والله منين ما غدي وهي وراي اعنبو من رباها غير تغمزلي
قلت له انا اوه كلنا تغمزلنا ما هو بس انت وما زعلنا اذا غمزت نصد عنها 0
تعشو الضيوف والجيران وسرو الجيران
جات جدتي عندنا في المجلس هو محل نوم باقي افراد الاسره
المهم يوم شافت التلفزيون تغشت ضحكت يعنني اعرف
ياجده ما يشوفونك شوفي احرك اصبعي على عين المذيع ولا ترف
قالت هين والله زي ما نشوفهم يشوفونا يا وليدي
حاولت اقنعها ما فيه فايده واستمرت اتغشى عنه عدة سنوات حتى بعد ما جا الملون
وتوفت رحمها الله
وهي تتغشى عن التلفزيون
ونسوان هاليام تاكل الرجال بعيونها
وهو يطالعها الين هو يستحي وينزل عيونه و هذه الزبده 0