[خيَّال الغلباء]

البارحه يا حسين مركاي كوعي =من العشاء لين أذن الفجر يا حسين
ما غير أسلي خاطري بالدموعي = مثل الذي من يقضي الدين بالدين
وكل السبب طيري حسين الطبوعي = النادر اللي شوفته تطرب العين
اللي إلى مني ندبته فزوعي = مثل الشجاع إلي نهموه القريبين
قمت أتذكر تلته للطلوعي = بخدن قنصنا فيه حروة اسبوعين
مدري ثمان أيام معهن اسبوعي = لا شك كنهن يا ابن الاجواد يومين
وفي تالي المقناص يوم الربوعي = أتلى العهد به راهي (ن) بالجناحين
أقفى وراء خرب مسقر جزوعي = متذير وأردفت من عقبه بطيرين
وسقنا معاهن وسط خد منوعي = أقفن شمال ومبعدات عن العين
وقفت أدربل مير ما من سنوعي = وقالوا جهاز الطير ما نسمعه زين
وأجهدت رجلي بكل رجم (ن) رفوعي = أرقى وألوح وأدبل الصوت صوتين
وما قصروا وقت المنافع ربوعي = وأخذت في جو القطامي نهارين
لا شك طيري ما نوى بالرجوعي = وأنا بعد حدرت يم البلادين
ما كان ودي والمفارق فجوعي = ليته موادعني سوات المحبين
الله يلوم الطير بعده يلوعي = خلاني أسهر والمخاليق ممسين
عساه يسلم من يدين الطموعي = اللي عن النشاد يخفي البراهين
وإلا الرجال اللي تعرف السنوعي = تلقى على حجله مع السبق رقمين
وإلا عساه بنايرات التنوعي = ورزقه على اللي خالق الناس من طين
ومما جرى يا حسين قلبي قنوعي = لو كان عقبه خاطري صاير شين

صح لسان الشاعر / مشعل بن حمود الحبيني العازمي .