[عـقيـد الـقـوم]

بـــسم الله الرحـمن الرحيــم

----------------------------

هذي قصيـدة شاعر الشعـراء ../ عـبد العزيز ابن سلمـان الفرّاج البليداني السبـيعي . وقد قالهـا قبل يومين او ثلاثه في امسية هـلا فبراير التي تنقـل على قناة المختلـف

والحقيقـه البرنامج كبـير وضخم ومتابع من فئه كبـيره من الناس وهو معروف ويقام كل سنـه

وما قصّـر اخوي ( ابو عبدالله ) نزّلهـا فديو في هالمنتدى وهذا رابطهـا للجوال :

http://www.zshare.net/download/8744002738d868/

وانا سوّيت اللي علي وفرّغتها كتابياً ،، والصراحه ما قصّر ابو سلمـان قصيده رائعه بيّض الله وجهه عليها تعتبـر كوثيقـه لنا ويستاهل والله حبّة الخشم عليهـا


:: الـــــــــــقـصـيـــــــــده ::

ربعـي سبـيع احيـا بجلود الأموات = والحكم لله ثم لصقر الجزيره
كنّـا على البـيرق عيون وردارات = ودونـه تقاطعنـا الجموع الغفيره
ولاء ولاء ماهو كلام وشعارات = اللي تردد فالسنيـن الأخيــره
صـولات في نجد العذيّـه وجولات = ليـن السعد فالمملكه حام طيـره
حنّـا سبـيع اللي صنعّنـا معجـزات = مانبطـش الا فوق الأسماء الشهيـره
وحنّـا سبـيع اهل الطروق المخلات = وحنّـا سبـيع اهل السيوف الشطيره
وحنّـا سبـيع اهل السلوم المنقّـات = لـنـا وجيـه وجاه يذري وجيـره
وحنـا سبـيع ان قيـل ياسبـع ردّات = نرمي بغالي الروح وسط السعيـره
وحنّـا سبـيع اهل الفعول المسمّــات = خيّـالنا ماقد نشد عن مصيره
لنـا مواقيفً تشرّف وعـادات = بذكـر بعضهـا لو بنبذه بقصيره
تاريخنـا مايحصره كتب وروات = ولا فالعربيّـه ولافالجزيـــره
الا وسامً في صدور البطـولات = عنهـا المقامـات الكبيـره صغيره
حنّـا هل المثلوثـه بفايتً فات = يوم السنين بجوعها مستطيره
ومنـاخ ذرّوّاي يوم المثارات = ومانقطع النقذه بوجه العثيره
وكبـار الشمايـل كسبنـا فالغزاوات = ونسهج حلال القوم صبح وظهيره
ومنّـا هل العشـر الفهود المضرّات = تحيزمو والموت جاهم بشيـره
ردّو ثلاث آلاف سطّوه وصملات = اللي ذبح واللي يدرّج كسيـره
وان فرّعـن البـيض واازداد الأصوات = وكلّـن تعزواله بعزوة عشيـره
نسكر دجر على ظهور العبـيّـات = والموت نستنشق شذاه وعبـيره
وان راحت علوم الرياجيـل وان جـات = غير السبـيعي من يدلّه قصيره
من غير قاصر في جميع السموّات = قبايلً بسلومها مستنيره
واليوم في نعمه وامان وحظارات = في ظل ابو متعب نظيف السريره
وختامها منّي سلام وتحيّـات = لهل الوجيه الساطعات المنيــره
وصلّو على من عرجبه للسماوات = وبيته واهل بيته ومن سار سيره

تحيّـاتي .