سواليف مع مشعاب ( مشعاب في النيبال )
 

[color=#6600CC][size=4]
حلقات سوالفجية يعدها ويقدمها مشعاب اخو عجراء


في مرة من المرارير كتب الله علي ان اسافر للنيبال

طبعا الربع كلهم مالهم شف يخاووني يقولون خل نروح للمغرب صيد وسعة خاطر

قلت لهم معصي

أنا عندي شغل بالنيبال و هذيك الدير مانيب رايح لها ابد

ولو تعطوني تذكرة واقامة خمس نجوم مارحت

عاد مشعاب مسوي فيها ثقيل ولاهوب راعي سوالف منيه منيه :(103):

كل ما لديت يم واحد من الربع قال ترجع بالسلامه -- يعني ما يمك الا خير

حجزت على اتحاد ابو ظبي والله مير نقلع على ذيك الطيارة الصفرا مدري ذهبيه

ونوقع في ابو ظبي

والله ماكنك الا بجده من طياره في باص في سرداب المهم طلعنا على ذيك القبه اللي كنك في بطن سلحفاه

ولها يمكن سبعه مخارج

الد يمين الد يسار الا كل انواع البشر في هالقبه باكستان فلبين هنود سواريه مصاريه

يعني امة الصمد مجتمعين وتعال تفرج


تبون اكمل لكم


خمسة ردود حلوه ونكمل :arabiyat-k:[/size][/color]

رد : سواليف مع مشعاب ( مشعاب في النيبال )
 

[color=#FF0000][B][align=center][size=5][font=Arial]

هههههههههههههههههههههههههههههههههه
الله يرجك يامشعاب وش وداك لذيك الديرة اللي مهيب
لنا ولا لأهلنا بس انت ماسمعت كلامي خل الله وياك


[/font][/size][/align][/B][/color]

رد : سواليف مع مشعاب ( مشعاب في النيبال )
 

يؤؤؤؤ يالمسالم

ابك علي الحرام ان القاره الهنديه ما ودك تجيها

بس عاد لو تشوف المواقف اللي يدافع البلاء واجهتني كان قطعت جوازك

بس ما عليه صيّورك تروح لها

رد : سواليف مع مشعاب ( مشعاب في النيبال )
 

هههههههههههههههههههههههههههههههههههههه

الله يعينك يمشعاب ولله مالهم لايم الي ماروحومعك


لا وبعد على طياره لونها اصفر >> صارة تكسي مهيب طياره ههههههههه

رد : سواليف مع مشعاب ( مشعاب في النيبال )
 

[color=#000066][size=4][align=center][size=4][font=Arial]متابع بصمت [/font][/size][/align][/size][/color]

رد : سواليف مع مشعاب ( مشعاب في النيبال )
 

[size=5]اخوي مشعاب النيبال مرة وحدة
وشعدنك فالديار
لاتكون داعي للاسلام ثم يقلبون المسلمين هندوس
خلهم على دينهم لايغتالونك ثم يحرقون فيك البوذية [/size]

رد : سواليف مع مشعاب ( مشعاب في النيبال )
 

[align=center][size=5]وهذي المشاركة الخامسة[/size] :plain:[/align]

رد : سواليف مع مشعاب ( مشعاب في النيبال )
 

[size=6]يالله يامشعاب كمل السالفه[/size]

رد : سواليف مع مشعاب ( مشعاب في النيبال )
 

[font=Arial][align=center][size=4][font=Arial]اكمل لكم السالفة لاني انا كنت معه في الرحلة

بشرط توصل الردود لمية[/font][/size][/align][/font]

رد : سواليف مع مشعاب ( مشعاب في النيبال )
 

[color=#6600FF][size=4]يا مرحبتين كبار

هذا أنا بكمل لعيونكم


[B][color=#FF0000]-(مشعاب في ابو طبي )-[/color][/B]
المهم يا طوال العمار يوم اني شفت هالعالم والزحمة دريت اني اكيد قدامي زحمات أعبر

وأثناء بصبصتي في الصالة الا واشوف استلام الأمتعة

قلت بس الشنطه --- الحق يا مشعاب شنطتك المسكنيه جالست لحالها تحتريك

واجيك اطامر لين وصلت سير الامتعه

الا والله هو ما عليه ناس ولا عفش

لا والله هذوليك البنتين اللي كنهم أريام الاماراتيه

قلت يا مشعاب خل البداوه وخلك رزه

مشعاب : فضلا أختي انا حاجز لكتماندو شنطتي وين استلمها

مسئولة العفش : هلا بك عطني البوردينك

مشعاب : ابك هاكياه لو تبين جوازي ما يغلى عليك

مسئولة العفش : شنطتك بتستلمها في كتماندو

مشعاب : طيب الف شكر



بعد هالمسرحية رحت للجوازات وختمت وقالوا معك 5 ساعات قبل رحلتك اللي بتروح فيها

وأجيك ازمزم اللاب توب ودي اني شحنته وافتكيت

ابص يمين يسار الا هذاك الهندي

الهندي : يبغا تكسي

مشعاب : اي بالله ابي مطعم زين وابي اشوف ابو ظبي عساها سحابة ناصر الفراعنه

الهندي : 50 درهم

مشعاب : وين سيارتك


والله مير نركب على هذيك الكراسيدا وسوالف قلت مر بي على السوق خلنا نشوف الأمراتيين

ويوم جينا السوق الا هو داج اكثره اجانب قلت يا صديق ودني لأحسن مطعم خلني ابرد كبدي

يمكن ما ألقى قدامي اكل زين


قال بوديك لمطعم ابو شقره


والله مير احاسبه واخذ النشبه اللاب توب وانزل للمطعم

الا كله مصريين اللي ياكل واللي يحاسب واللي حتى يبصبص فيك

قلت يا بيه عاوز سمك مع رز صياديه

قال طيب

قلت وعطني عصير برتقال وزبطووو

قال تمام يا عم

ثم اجلس انقنق في المتبل والخبز المصري لين جاء العشاء

وادق في النعمه قلت

الكورنيش كم يبعد

قالو 500 متر

قلت والله تمام

واجيك ماشي

واحصل كورنيش راقي جدا وفي الليل خيالي

وادقها تفكير في النيبال واسوي بعض الترتيب للعمليات الفكرية اللي ما رتبتها

المهم على الشاطي ممشى فيه ما هب ودب

رايحين جايين

جلست يمكن ساعتين

قلت يا مشعاب الحق الطياره خل عنك الشواطي

واجيك طالع واخذ تكسي بالعداد و تطلع الرجعه بثلاثين وتكسي حلو


وبصراحة اعجبتني ابو ظبي ابراج وشوارع بس اقل من المتوقع بالنسبه لي

وارجع واختم وادخل لصالة المغادرة


وعلى شانكم حلوين بكتب الحلقه القادمة بعد هذي ومجانا بدون ردود


بعدين انت يا نهار .. لا تعلم بالاشياء اللي ماذكرتها

لا تصير خثرودي وتعلم على خوبك [/size][/color]

رد : سواليف مع مشعاب ( مشعاب في النيبال )
 

[color=#6600FF][size=4]

[COLOR="red"]-(مشعاب في كتماندو)-[/COLOR]
طلعنا في الطياره واصكها نومة

كل ما قالوا تبي شيء سويت مثل الهنود هزتين بالراس يمين يسار وخلاص

صحيت ابي اشوف الارض الا غيوم

المهم نزلنا في مطار متواضع بس مرتب وحلو

واجي للجوازات ويصكوني باربعين دولار قلت بسيطه

فيزة المطار تستاهل لأنها سهله وانت ماشيء

المهم يالربع ما اخفيكم كنت مشتاق لشنطتي وخايف عليها من امس وهي مسافرة لحالها

ويوم جيت الا هي تدور على السير تحراني

وأجيها واضمها وتبكبك شوي واخذ رسنها واحط النشبه فوقها اللي هو الكمبيوتر

ونطلع ونصرف فلوس والقى هذاك الواحد اللي تقول نسخة من كرزاي

بشيبه وطاقيته

المهم صقعته بكم كلمه انقليزية قال عندي فندق وسط المدينه

وقال الفنادق الفخمه بعيده كل مره بتاخذ تكسي

المهم طعته وعطيته حق ليله مقدم والتاكسي مجاني

وهو يركب معنا ونجي للفندق

قال هذا حي ثاميل


قلت اخس موديني لحي السكارى يالخسيس

قال كل كتماندو سكارى

دريت ان الوضع متأزم

والله نجي لهذاك الفندق الصغير النظيف المتواضع

ويعطوني غرفه

قلت ابي فطور ولا غدى

واجيك نازل للمطعم

الا القوارير مرصوصه ولا شفت اكل

يا صديق : وش هالقوارير

قال هذي الشمبانيا واخواتها

قلت فيه اكل مسلمين

قال ابدا كلها مذبوحة بسم رب الهندوس

قال ما فيه قدامك حلال الا الشاهي والحليب

قلت عطني شاهي وحليب اقل شي نكسب طاقه

المهم البطن ما اقنعه الشاهي قام يوصوص

انشد ما فيه احد من الاجواد نسير عليه

قالو الاجواد عانك رايح ومخليهم

ويدلوني على مطعم اسلامي

واروح له واحصل لي اكل زين

يالله لك الحمد

عقب الغدى قدرت اشوف المدينه وفتحت عيوني

امطار والغيوم على بعد مترين فوق راسك والجو بارد

مدينه منتازه من جهة الجو ومرتبه وعدد سكان الدولة اصلا قليل ما يتعدى 18 مليون


خلال اسبوع قضيتها بين الفندق والمطعم الاسلامي

ودردشة مع كل المسلمين اللي جون هناك من انحاء الكره الارضية

اكثرهم يبون الحج ولا قدروا


في نيبال اعلى قمه في العالم

اللي يبي يطلع لها يحتاج ان يكون رياضي وياخذ تدريبات ستة اشهر

واللي يبي شوفها بالطياره يدفع 166$ والرحله يمكن ساعتين

ما فيها شيء راس ضلع عليه ثلج

قلت في نفسي والله ان مشراف في طعوس خابرها ازين من هالقمه وثلجها

نيبال بلد صاد والزحمه عليه قليله من العرب

لكن الاجانب فيه واجد

وهو بلد يمكن للعايله التنزه فيه

من جهة الجو البارد و يوجد فيه احتشام فطري



المهم خلصت من النيبال ورحت للهند بالسيارة

وليتني ما رحت


بكره بكمل لكم حتى لو ما تردون [/size][/color]

رد : سواليف مع مشعاب ( مشعاب في النيبال )
 

[size=6][align=center][color=#FF0000]المترجم الخاص للرحالة مشعاب[/color]
[color=#000000]اليكم بعض معاني الكلمات [/color]
زحمات أعبر / [color=#000033]زحمة شديدة[/color]
كنهم /[color=#000033]كنهن[/color]
رزه /[color=#000033]انيق[/color]
لكتماندو / [color=#000033]مدينة في نيبال[/color]
ابك / [color=#000033]ليست في القاموس[/color]
ازمزم / [color=#000033]احمل[/color]
سمك مع رز صياديه / [color=#000033]اكله خاصة للسفريات[/color]
خثرودي /[color=#000033] ثرثار[/color]
وتبكبك /[color=#000033]ابكي[/color][/align][/size]

رد : سواليف مع مشعاب ( مشعاب في النيبال )
 

[QUOTE=عوض الخلف;214804][size=6][align=center][color=#FF0000]المترجم الخاص للرحالة مشعاب[/color]
[color=#000000]اليكم بعض معاني الكلمات [/color]
زحمات أعبر / [color=#000033]زحمة شديدة[/color]
كنهم /[color=#000033]كنهن[/color]
رزه /[color=#000033]انيق[/color]
لكتماندو / [color=#000033]مدينة في نيبال[/color]
ابك / [color=#000033]ليست في القاموس[/color]
ازمزم / [color=#000033]احمل[/color]
سمك مع رز صياديه / [color=#000033]اكله خاصة للسفريات[/color]
خثرودي /[color=#000033] ثرثار[/color]
وتبكبك /[color=#000033]ابكي[/color][/align][/size][/QUOTE]

[size=7]ههههههههههههههههههههه اما ابك هذي اللي مالها تعريف او معنى سوا انها مصيبه او نكبه أو كارثه مثل (ابك ابك ابك الناقه لا تصدمها )[/size]

رد : سواليف مع مشعاب ( مشعاب في النيبال )
 

[size=7]س/ مشعاب معك احد والا لحالك؟

الجواب بعد الفاصل[/size]

رد : سواليف مع مشعاب ( مشعاب في النيبال )
 

[color=#6600FF][size=4]يالله حيهم

يؤؤؤ يالمترجم عوض

ان شاء الله في السالفه الجايه بجيب كلمات قديمه ماظني تعرفها الا كان باتصال بصديق

يا ماجد ما قريت اول السالفه وش قالو لي الربع

يقولون تروح وترجع بالسلامه -- يعني ما يمك الا خير -- ورحت alone

وهاكم باقي السالفه


في كتماندو عاصمة النيبال تستطيع رؤية مثال على عبادة قريش

بتلقى هناك اصنام في الطريق ملطخت وجيهها بالرز يبونها تاكل جعل مهوبه

وصنمهم الكبير بوذا موضوع في حوش والحوش هذا محطوط في جنبه من توالي الشارع حاجات تشبه لفة الشورما كل من جاء هاللفات عطاها دوره ابد كنه معلم شورما وهي كنها خشب مدري حديد

داخل حوش البوذا درج لين تاصل عند ربهم وهو مصنوع من البلاتين الأصفر و هو ثلاثة اشخاص

بنتين والظاهر ثالثهن رجل شاخصات في هالحوش

والسدنه يستغلون اللي جاي واللي رايح والسياح وياخذون القربان من هالسخفاء


في دين بوذا كل الناس ممنوعين من ذبح الحيوانات

على شان كذا اكثرهم نباتيين

ويجوز عندهم اكل اللحم اذا كان ذابحه غير بوذي


طبعا بوذا هذا اتباعه في نيبال و تايلاند واليابان والفلبين وكثير من الصينيين و فيتنام

يعني شرق اسيا مبلين بالهديانه الشركية السخيفه


[color=#FF0000]-( مشعاب يسافر برا للهند )-[/color]

يوم خلصت اشغالي اللي رايح من شانها لقيت لي سعودي راعي مكتب استقدام

و تصادقنا -صداقة طريق - واتفقنا اننا نروح للهند بالسيارة لجل نشوف نيبال والهند دفعة واحدة

المهم لقينا مكتب قال تدفعون 7000 روبيه واضبط لكم برنامج السفر

تواعدنا بكره صلاة الفجر ولا جونا اهل المكتب الا 7 صباح

خذنا على ذيك السيارة القرنبع وشوي الا انا في مواقف الباصات

كنا شارطين باص سياحي 5 نجوم

ويوم جينا الا حاجز لنا على خط البلده كراسيه مغير حديد ما عليها وقاه

خويي يقول وش رايك قلت البدو يقولون : اذا استوالك كور ومركب لما تركب منتب رجال

والله مير نركب ونمشي ويحمله من خلق الله

كل شوي راكب عشره لين ما عاد الا بيركبون فوقنا

والله ونمشي من 8 صباح الى 4 العصر يعني ثمان ساعات وحنا في يطريق نسخة من اللهدا

محولين من راس ضلع كتماندو

بس الخط زين وانواع الشلالات وسيول ومطر


وقف عند ذيك الاستراحه ونجي بنتغدى قالو اكل مسلمان نهيه

يعني ما فيه اكل اسلامي عاد حنا ما افطرنا ولاحقنا قصى

شرينا بسكوت صناعته اجنبيه قلنا مير يكون نظيف


يوم جت الساعه اربع العصر ولا والله الرياجيل مسكرين الطريق ومعهم عصي



يقولون اللي حالبة امه على خشمه يتقدم


ابك ابك ابك يا خوي وش السواه

قالو تقيمون هنيا ولا سياره تعدى

وش بلاكم قالوا امس ابه راعي باص ذابح له اربعة من جماعتنا وحد دمهم ما غسله المطر وراح ما فيه سياره بتوطاه احترام لهم


و لقينا لنا لفو اجنبي وصرنا نتشاور

وسألنا عن المسافه بين محلنا و اقرب نقطة فيها سيارات قالو 20 كيلو


أخيرا اتفقنا نمشي هالعشرين كيلو

أنا شنطتي اشوى خفيفه لكن خويي معه شنطة تقول شنطة مرة طامح

ماليها ملابس شكله راعي طويله

المهم حطيت النشبه - الكمبيوتر - فوق الشنطة وجيت مستحبها وخويي مثلي


ويوم خذينا شوي الا هو يوم جلس تعب من الطريق

ونلقى لنا ركتشا - سيكل عربه - ونركب معه ويوم بقى 3 كيلو الا هذيك الجموع بعصيهم يقولون هذي منطقة الحادث!!

يا والله الليل

حولنا من الركتشا ومشينا يمكن ثلاث ساعات نسحب هالشناط وكل ما لقينا مطعم قال ما فيه اكل حلال

جينا محل الحادث ولا لقينا لا دم ولا هم يحزنون بس هم منجرحين من موت ربعهم


نمشي ونجلس كنا رعيان بدو ---- لين وصلنا الباصات


وناخذ باص لاقرب نقطة حدود هنديه


حوالي 11 بالليل

خذنا غرفه ورحنا بني نتعشى

قالو ما به اكل اسلامي كله بذبوح باسم البوذا


أما خويي قال عطني واحد نفر دجاج بوذي وزبطووو

قلت انا والله ما يطب بطني

واطلب واحد رز

اما رزهم عاد روعه مطبوخ بماء ولا عليه ملح ولا شيء انواع السماجة

واطلب ملح وسلطه

المهم يالربع الجوع شين والله ان كنه نفر مندي


قلت عطني شاهي قال ما فيه

اما خويي الله يذكره بالخير ما خلى عندهم شيء اكل من كل شيء



ويوم اصبحنا

اصلا ميسين من الفطور بس نقول يمكن نلقى حليب ولا شاهي ولا شي ساخن

لقينا كشك عنده حليب بارد وشربنا من عنده

وخذينا سياره خاصة من هذي المدينه لأقرب منطقة قطارات بالهند

ومشينا 1 ظهر رحلة حلوه في السياره مزارع وناس ولا وصلنا الا 5 العصر


أول ما وصلنا مدينة قرانكور همنا اننا ناكل

يومين الفاصل بينهم صحن رز صامط

ونلقى مطعم اسلامي وكل منا يطلب حق نفرين وناكل لين شبعنا

ونحجز على القطار غرفه مكيفه

ونركب على القطار قالو تبون عشاء قلنا فيه عشى اسلامي قالو ما فيه

قلنا حنا مضربين عن الاكل

والله مير نسدح السرير ونرقد من 7 مساء حتى 7 صباح وحنا في اسرتنا مسافرين 12 ساعة

طبعا صلواتنا جمع ونصلي على حسب الحاله مرة نصلي في الباص ومره في القطار

وفعلا في مثل هذي الرحلات تحتاج للجمع مهوب مثلنا على سياراتنا في وسط ديرتنا



أخيرا وصلنا دلهي العاصمة الهندية وكان في استقبالنا معرفة لكنه لطعنا 3 ساعات




اليوم احس اني طولت عليكم


تبون تعرفون شيء عن العاصمة الهندية ومركز نظام الدين الخاص بجماعة التبليغ تبون تعرفون قصة العشرين مسكين وثمن كلمة يس بكمل لكم بكره[/size][/color]

رد : سواليف مع مشعاب ( مشعاب في النيبال )
 

[align=center][size=5][color=#000000]شكرا لكم اخواني على المتابعة الشيقة
من مقتطفات الرحالة مشعاب واليكم بعض معاني الكلمات ::

[color=#990000]هاكم /[/color] اليكم
[color=#990000]ملطخت /[/color] ملصقة
[color=#990000]جعل مهوبه / [/color]ليس بالشفاء
[color=#990000]من توالي الشارع /[/color] بجانب الشارع
[color=#990000]القرنبع /[/color] خردة
[color=#990000]خط البلده /[/color] كلمة تستعمل للقديم
[color=#990000]وقاه / [/color]حاجز
[color=#990000]كور /[/color] عبد
[color=#990000]عصي /[/color] اداة خشبية للضرب
[color=#990000]اللي حالبة امه على خشمه /[/color] كلمة تستعمل للتحدي
[color=#990000]وش السواه / [/color]ماالعمل
[color=#990000]تقيمون/ [/color] تلزمون المكان
[color=#990000]تعدى/[/color] تتحرك
[color=#990000]بتوطاه /[/color]اضربه
[color=#990000]لفو / [/color]نفر
[color=#990000]مرة طامحا /[/color] مرأة لاتريد زوجها
[color=#990000]راعي طويله / [/color] مستعد للانتظار
[color=#990000]الجموع /[/color] الناس ( العصابة)
[color=#990000]منجرحين / [/color] متحسرين
[color=#990000]صامط /[/color] سادة
[color=#990000]لطعنا / [/color]اخرنا

[color=#000033]ونترككم الان مع الفاصل ونواصل بقية الرحلة الشيقة مع الرحالة
مشعاب في بلاد الهند و قصة العشرين مسكين وثمن كلمة يس[/color][/color][/size][/align]

رد : سواليف مع مشعاب ( مشعاب في النيبال )
 

[color=#6633CC][size=4]هلا بكم





[color=#FF0000]-( مشعاب في نيودلهي )-[/color]



في محطة القطارات بدلهي بتشوف عشرات السكك بين كل سكة وسكة رصيف مظلل يمكن عرضة عشر متر

وعلى هذا الرصيف المسافرين بشناطهم وعفشهم وبضائع لكثير من مدن الهند


يوم وصلنا نزلنا و كلمنا المعرفة قال بجيكم وكل نصف ساعة يقول ربع ساعة وجاي

أنا استحيت من خويي ولا بغيت اخليه بس خويي مرتب مع هالعلة بعمل وامسكتنا الخوة

وثلاث ساعات واخيرا وصل

مشينا من المحطة وقلنا أهم شيء يكون قريب من الفندق مطعم اسلامي

قال ما فيه الا مركز نظام الدين

ويحكي لنا قصة نظام الدين مع الحكومة ودعمة للدعوة في الهند

والله ويودينا لفندق قريب من مركز التبليغ يمكن 100 متر
ونستأجر هذيك الغرفة اللي كل شيء فيها زين ونظيف ولا يوجد تلفزيون ولا انترنت

و انتسبح و نروح ندور غدى

وندخل هذاك المطعم
المشكلة أهله لا يعرفون عربي ولا عنقريزي

المهم جاب لنا رز ابيض وصحن مرق باللحم

وقام يهرجني وكل ما قال شيء قلت له يس

يعني عطنا منه

أثر الرجال يقول تبون تصدقون على المساكين وأنا اقول له نعم

والله ويطلع في الشارع ويجمع خلق الله ويدخلهم المطعم ويعدهم ويعاين فيّ!!

قلت ياخوي الرجال وش بلاه

قال مهوب فاضي لك بيغدي ربعه قبلك

يوم رصهم على الطاولات حوالي عشرين شخص

وهويجيب لي اربعة صحون عرفت بعدين انه يقول وش تبي نعطيهم

قلت يس ما تنفع مابه الا اهز راسي

هزيت له راسي كم مرة وهو يقوم يجدل عليهم ويخلينا

قمنا نهرج بالعربي قلنا يمكن يفهمونه وشوي الا منادين واحد يفهم عربي

قال الرجال غدى المساكين على حسابكم

قلنا يا ابن الحلال حنا بعد مساكين وجوعانين ونبي غدى

قال تحاسبون عنهم

قلنا طيب كم النفعر قال بـ 20 روبية يعني اقل من ريالين

قلت له تم بنحاسب بس عطنا غدى اول

وهو يعطينا هذاك الغدى المضبوط المبارك الرخيص

بس بريالين الشخص

ونحاسب عن غدانا وعن المساكين

بصراحة جلست اتذكر الأحلاف اللي حنثت فيها واحتسب هالمساكين عن حلفين


ونرجع ونتقهوى الشاهي في الغرفة ونصير نصلي في المكز ونحضر بيانات التبليغ

مركز التبليغ مكون تقريبا من سبع طوابق اسفلها وثانيها مسجد

وفيها من قدماء دعوة التبليغ الكثير من الهند وباكستان واندونوسيا والفلبين

لديهم في المركز مكاتب تذاكر وموزعين الضيوف الى اقسام
قسم العرب
قسم الأوردو
قسم للكيرلا
وقسم انجليز
وقسم شرق اسوي

والبيان يكون من قبل كبار التبليغيين ويترجمونه مترجمين في كل قسم

بعد صلاة الفجر بحوالي نصف ساعة يبدأ بيان الفجر وذهبت لقسم العربية واشوف سعوديين وسودانيين و شوام

والمترجم كأنه سعودي او يمني ويترجم كلام صاحب البيان فقط

خلال ساعة ينتهي البيان

في البيان يتحدثون عن هم تبليغ الناس الدين
ويتحدثون عن تعظيم الله وعن قصص وكرامات الدعاة

وهم نسخة من دعاة التبليغ هنا ونفس الفكر مثل الزيارات والبيانات الخ .

مشكلتهم العويصة التي تجعل طريقتهم ضلال كما قال الشيخ صالح الفوزان

هي انهم لا يدعون للعلم ولا يتعلمونه

فهم يدعون العالم للتبليغ وطريقته وليس للاسلام
خلال اسبوع تجولنا في دلهي شوارع ليست مزدحمة مثل بومباي فيها اشجار والجو رطب ويغتشيها الضباب ليلا ودرجات الحرارة تقريبا من 14-28

دلهي لن ترى فيها الأبراج وناطحات السحاب فهي تدار بنفس فكر ابن مقرن امين مدينة الرياض

يؤمنون بالفكر الانبطاحي

يعني يبون يتوسعون افقي

وأكره شيء يشوفونه الأشياء المرتفعة

سفارتنا هناك معقدين كالعادة

فهم يحتاجون تحسسهم انهم خدموك وما قصروا قبل ان يخدمونك

فهم يحتاجون دورة في سينغافورة لمدة عام مع الأعمال الشاقة ليعرفون سر التطور الخلقي

المسلمين في دلهي كثير ولكنهم اسم فقط

يحتاجون تعليم ووعي

فصدق على بعد ثلاثة أمتار من مدخل مركز نظام الدين هناك كشك لبيع الدخان

وصدق على بعد ثلاثة أمتار من مدخل هذا المركز التبليغي لا تغلق المحلات للصلاة وهي لمسلمين



أما مطار دلهي فهو اشبه بمطار بيشه

تحس بالفقر المدقع عند نزولك في هذا المطار

تكاسي يمكن من مديلات 1970 من هذيك اللي نشوفها في الافلام المصرية أيام اللون الأبيض والأسود


اذا تبي تكسي تمسك سرى على الكشك اللي سقفه صاج حديد لكي تاخذ تذكرة

واللي بيدلك على التاكسي يبي روبيات وصاحب التاكسي واللي بيشيل شنطتك

لكن اذا كنت مغادر من هالمطار يمكن ما تحس بعشوائية الهندوس في ادارة حكومتهم التعيسة


يؤؤؤ يا مشعاب خلاص حكي

ايه صح هالمرة ما فيه كلمات للمترجم عوض كلها مضبوطة

بس هذا على شانه آخر السالفة وحبيت اخفف على ابو حلوين




متشكرين على المتابعة وعساني ونستكم


The end [/size][/color]

رد : سواليف مع مشعاب ( مشعاب في النيبال )
 

[size=5][align=center]اخوي مشعاب الحمد على السلامة ولاتعبت
من ناحية الاطعمة اليس في الضرورة تحلل المحرمات
يعني اذا كان مافيه الا هذا الاكل وش العمل هل يغني
البسكوت والحليب اعتقد ان سوف تعاني من سوؤ التغذية
مايباع حلال او دجاج حي تقوم تذبحه وتطبخه ولاضبان متسدحه
على شعيب دلهي وحقيقة استغربت من كلامك على اهل التبيليغ
بانهم ليسوا كما نعتقد بانهم اصحاب علم ودين صحيح من اين لهم الدعم
المادي وهل يعانون من ضغوط من الحكومة الهندية وايضا المحلات التجارية العائدة
الى المسلمين تقول انها لاتغلق لاداء الصلاة من الممكن ان يكون العاملين بها من غير
المسلمين .......
رحلة ممتعة اخوي مشعاب والحمد لله على السلامة وابشر بالعوض اخوي مشعاب
نبي نروح انا وياك الى رحلة ممتعة بلاد هند بلا نيبال سوف اتوجه بك الى بلاد الشام
وراح نشوف العالم ( المتحضره المسلمة ) على حد تعبيرهم قل تم [/align][/size]

رد : سواليف مع مشعاب ( مشعاب في النيبال )
 

[font=Courier New][color=#008000]لاهنت يامشعاب على هالقصه الرائعه



والحمد لله على السلامهـ


طيب ماقلت لنا وش صار الين رجعت للسعوديهـ<<< هذا ولله الناشب[/color][/font]